قازاقستاننىڭ دەنساۋلىق ساقتاۋ ءمينيسترى ەلجان ءبىرتانوۆ توتەنشە جاعداي بويىنشا مەملەكەتتىك كوميسسيانىڭ سوڭعى شەشىمى جايلى Facebook پاراقشاسىندا جازدى. 

– ەلىمىزدە قابىلدانعان قاتاڭ كارانتيندىك شارالار كوروناۆيرۋستىق ينفەكسيانىڭ قارقىنىن تومەندەتتى، ىندەتتىڭ تارالۋى 28 ناۋرىزدا 52 پايىزعا جەتسە، وتكەن تاۋلىكتە ول 12 پايىزعا دەيىن ءتۇستى. بۇل سانيتارلىق جانە مەديسينالىق قىزمەتتىڭ شۇعىل جۇكتەمەسىن ازايتۋعا، ينفەكسيانى جۇقتىرعان جانە ناۋقاسپەن بايلانىستا بولعان ادامدارعا ءتيىمدى كومەك كورسەتۋگە مۇمكىندىك بەرەدى، – دەپ جازدى ءبىرتانوۆ.

مينيستر وزگە مەملەكەتتەردىڭ تاجىريبەسىنە قاراپ، ەلىمىزدە ىندەتتىڭ نەگىزگى كەزەڭى ءساۋىر-مامىردا وتسە، كوروناۆيرۋس ينفەكسياسىنىڭ شارىقتاۋى - ءساۋىردىڭ ءبىرىنشى جارتىسىنا تۇسپا-تۇس كەلەتىنىن بولجاۋعا بولاتىنىن جەتكىزدى.

– ءبىزدىڭ ەلىمىزدە اتالعان ارالىقتا ناۋقاستار سانى 3 مىڭ 500 جەتۋى مۇمكىن (ءقازىر 551). ەپيدەميولوگتار الداعى ۋاقىتتا، ياعني، جاز ايلارىندا ىندەتتىڭ قارقىنى تومەندەيدى، ءبىراق تۇبەگەيلى توقتامايدى دەپ وتىر. كەيبىر ساراپشىلار ەپيدەميالىق ماۋسىمنىڭ بيىل كۇزدە قايتالانۋى ءمۇمىن ەكەنىن جوققا شىعارمايدى. سوندىقتان دا ءبىز ەپيدەميا كەزىندە دە، ۇزاق مەرزىمدى كەزەڭدە دە مۇقتاج ازاماتتارعا تولىق مەديسينالىق كومەك كورسەتۋگە جان-جاقتى دايىن بولۋىمىز كەرەك، – دەپ ەلجان ءبىرتانوۆ اتاپ ءوتتى.

سونىمەن قاتار ول كوروناۆيرۋستىق ينفەكسيا جۇقتىرعان ناۋقاستاردى ەمدەۋگە ارنالعان 3 920 ينفەكسيالىق توسەك-ورىن، كۇدىكتى پاسيەنتتەر ءۇشىن 7 300 جۋىق توسەك-ورىن ازىرلەنگەنىن جانە 170 وكپەنى جاساندى جەلدەتۋ اپپاراتى جانە 38 قاننىڭ ەكستراكورپورالدىق مەمبرانالىق وكسيگەناسياسى اپپاراتى (ەكمو) ورناتىلعان، جاعدايى اۋىر 180 ناۋقاستى قابىلداي الاتىن رەانيماسيالىق بولىمشەلەردىڭ دايىن ەكەندىگىن اتاپ ايتتى.

– ەمدەلۋشىلەر جۇقپالى اۋرۋلار اۋرۋحاناسىندا ورتا ەسەپپەن 3-4 اپتا جاتادى، سونداي-اق، ەلدى مەكەندەردىڭ تىنىس-تىرشىلىگىنە قاجەتتى قىزمەت كورسەتەتىن كاسىپورىنداعىلار، كۇنى-تۇنى جۇمىس ىستەپ جۇرگەن پوليسيا، مەديسينا جانە قارۋلى كۇشتەر قىزمەتكەرلەرىنىڭ ينفەكسيا جۇقتىرۋى ابدەن مۇمكىن ەكەنىن ەسكەرسەك، بىزگە ءالى دە كوپتەگەن توسەك-ورىن مەن ارنايى اۋرۋحانا قاجەت، – دەدى مينيستر.