كارانتين جاعدايىنا بايلانىستى كىرىسىنەن ايىرىلعانداردىڭ ءبىرى – گاۋھار ەسىمدى الماتىلىق. ول جەكە كومپانيادا پەداگوگ بولىپ جۇمىس ىستەگەن. "وسى كۇردەلى كەزەڭدە 42500 تەڭگەلىك جاردەماقىنى الىپ كادىمگىدەي قۋاندىق" دەيدى. بۇل تۋرالى almaty-akshamy.kz حابارلادى. 

– قالادا قوسىمشا ءبىلىم بەرۋ ورتالىعىندا جۇمىس ىستەيمىن. ەرەسەكتەر مەن بالالاردىڭ تۇلعالىق دامۋى مەن ولارداعى ءبىلىم پوتەنسيالىن ارتتىرۋعا، بويىنداعى قابىلەتتى اشۋعا كومەكتەسەتىن جەكە كومپانيا. ءبىزدىڭ ورتالىققا بالاسىنا ينۆەستيسيا قۇيۋدان ايانبايتىن بارلىق قالالىق تۇرعىندار كەلەدى. ءتىپتى، زەينەت جاسىنداعى كىسىلەر دە كەلىپ تۇرادى. كوروناۆيرۋس قالادان ەندى شىعا باستاعان كەزدە ورتالىققا كەلىپ جۇرگەن بالالاردىڭ ساۋلىعى ءۇشىن كومپانيا بىردەن ءوز جۇمىسىن توقتاتتى. كومپانيادا قىرىق شاقتى قىزمەتكەر بولاتىنبىز. قىسقارتۋعا كەتكەندەرى دە بار. ال پەداگوگ رەتىندە بىزدەردى بەلگىسىز مەرزىمگە دەمالىسقا جىبەردى. ءتىپتى، ول دەمالىس مەرزىمىنە ەشتەڭە تولەنگەن جوق، – دەدى گاۋھار.

ول قارجىدان قيىندىق كورگەنىن اتاپ ءوتتى.

– ويتكەنى، تولەپ وتىرعان نەسيەم بار، وعان قوسا قالانىڭ ىشىندە پاتەر جالداپ تۇرامىن. قارجىلاي داعدارىستى ءوز باسىم بىردەن سەزدىم. ۇكىمەت ءبىز سەكىلدى ادامدارعا جاردەماقى بەرەدى دەگەندە كادىمگىدەي قۋانىپ قالدىم. بىرنەشە رەت enbek.kz سايتىنا ءوتىنىش بەردىم ەلەكتروندى تۇردە. باسىندا جاۋاپ بولمادى. بىرنەشە كۇننەن كەيىن «ءسىزدىڭ ءوتىنىشىڭىز قارالدى، ەندى ول «ازاماتتارعا ارنالعان ۇكىمەت» مك جىبەرىلدى» دەگەن حات كەلدى. سودان كەيىن ماعان 42 500 تەڭگە ءتۇستى. سول كەزدەگى قۋانىشىما ۇيدەگىلەر كۋا. كارانتين كەزىندە جۇمىسسىز جاتقان ادام ءۇشىن بۇل دا ءبىر قولداۋ ەكەن. كادىمگىدەي، كوڭىل-كۇيگە دە اسەر ەتەدى مە، وسىنداي قيىن كەزدە جالعىز قالدىرماعان ۇكىمەتكە راحمەت! وسى جولى شىن ريزامىن، – دەپ الماتىلىق پەداگوگ العىسىن ءبىلدىردى.