الماتى قالالىق تاۋارلار مەن قىزمەتتەر ساپاسى مەن قاۋىپسىزدىگىن باقىلاۋ دەپارتامەنتىنىڭ باسشىسى، قالالىق باس سانيتارلىق دارىگەر ايزات مولداعاسىموۆا قىزمەتتەن كەتىپ ونىڭ ورنىنا ەلدىڭ بۇرىنعى باس سانيتار دارىگەرى جانداربەك بەكشين تاعايىندالدى.

ايزات مولداعاسىموۆا سوڭعى ۋاقىتتا بىرنەشە داۋلى وقيعانىڭ ورتاسىندا ءجۇردى. ول مەديسينا قىزمەتكەرلەرىنىڭ جاپپاي كوروناۆيرۋس جۇقتىرۋ دەرەگىنىڭ ءبىر سەبەبى دارىگەرلەردىڭ ساقتىق شارالارىن ساقتاماۋى ەكەنىن ايتىپ، كىنانى مامانداردىڭ وزىنە ارتقان.

سانيتارلىق دارىگەردىڭ بۇل سوزدەرىن №12 ورتالىق قالالىق كلينيكالىق اۋرۋحانانىڭ مەدقىزمەتكەرلەرى "نەگىزسىز ايىپتاۋ" دەپ، دەپارتامەنت باسشىسىنىڭ وتستاۆكاسىن تالاپ ەتتى. سونداي-اق اتالعان اۋرۋحانانىڭ گينەكولوگيا ءبولىمىنىڭ مەڭگەرۋشىسى گاۋحار امىرەيەۆا مەن تاعى 33 دارىگەر ايزات مولداعاسىموۆانى سوتقا بەرەتىنىن ايتقان.

وقيعاعا بايلانىستى دسم ماماندارىنان ارنايى كوميسسيا قۇرىلىپ، ەپيدەميولوگيالىق تەكسەرۋ باستالعان. دەنساۋلىق ساقتاۋ ۆيسە-مينيسترى كامالجان نادىروۆ سانيتارلىق دارىگەردىڭ سوزىندە قانداي دا ءبىر زاڭ بۇزۋشىلىق انىقتالسا، تيىسىنشە جاۋاپقا تارتىلاتىنىن ايتقان.

ال بۇعان دەيىن بۇرىنعى باس سانيتارلىق دارىگەر كوروناۆيرۋس جۇقتىرعان جولاۋشىمەن ءبىر رەيستە كەلىپ، 14 كۇن كارانتينگە وقشاۋلانعان بولاتىن. ارتىنشا جينالىستارعا قاتىسىپ، اشىق جۇرگەنى ءۇشىن قالالىق قوعامدىق كەڭەس تاراپىنان سىنعا ۇشىراعان. 

ول بۇل قىزمەتكە 2017 جىلى كەلگەن.

ايزات مولداقاسىموۆانى الماستىرعان جانداربەك بەكشين قوعامدا قىزۋ تالقىعا تۇسكەن سوزىنەن سوڭ كوپ ۇزاماي ەلدىڭ باس سانيتار دارىگەرى قىزمەتىنەن كەتكەن. ول باس سانيتار بولىپ تۇرعاندا "ءبىزدىڭ بولجامىمىزشا، 11-16 ناۋرىز ارالىعىندا ەلگە كوروناۆيرۋس اقىرى كەلەدى" دەپ سوزدەن سۇرىنگەن بولاتىن.