الماتى قالاسىنىڭ اكىمى باقىتجان ساعىنتايەۆتىڭ تاپسىرماسى بويىنشا قالا اكىمىنىڭ ورىنباسارى ەرجان باباقۇماروۆ بەينە-كونفەرەنس-بايلانىس رەجيمىندە قالالىق ينفەكسيالىق جانە پروۆيزيالىق اۋرۋحانالاردىڭ باس دارىگەرلەرىمەن كەڭەس وتكىزدى. بۇل تۋرالى قالا اكىمدىگىنىڭ باسپا ءسوز قىزمەتى حابارلادى.

جيىنعا مەملەكەتتىك باس سانيتارلىق دارىگەر جانداربەك بەكشين مەن قوعامدىق دەنساۋلىق باسقارماسىنىڭ باسشىسى تىلەۋحان ابىلدايەۆ قاتىستى.

جيىننىڭ باستى ماقساتى – COVID-19 جۇقتىرعان ناۋقاستارمەن جۇمىس ىستەيتىن مەديسينا قىزمەتكەرلەرىنىڭ ەڭبەك قاۋىپسىزدىگىن قامتاماسىز ەتۋ بويىنشا قابىلدانىپ جاتقان شارالار تۋرالى باس دارىگەرلەردىڭ ەسەبىن تىڭداۋ.

ىشكى ينفەكسيالىق باقىلاۋدى كۇشەيتۋ، ەپيدەمياعا قارسى رەجيم ستاندارتتارىن ساقتاۋ جانە دارىگەرلەر مەن مەديسينا قىزمەتكەرلەرىنىڭ ەڭبەك قاۋىپسىزدىگى ماسەلەلەرى قارالدى. سونداي-اق مەديسينالىق ۇيىمداردى جقق-مەن قامتاماسىز ەتۋ، ونى پەرسونالدىڭ دۇرىس پايدالانۋىن قاداعالاي ماسەلەسى ءسوز بولدى. ينفەكسيالىق پالاتالارداعى سۇزگى-بوكستارىنىڭ جۇمىسىن ۇيىمداستىرۋ، مەكەمەلەردىڭ ءۇي-جايلاردى «تازا» جانە ينفەكسيالانعان ايماقتارعا ءبولۋ قاعيداتىن ساقتاۋى، سونداي-اق جەلدەتۋ، بەينەباقىلاۋ جۇيەلەرىنىڭ جۇمىس ىستەۋى، قابىلداۋ بولىمشەلەرىنىڭ «3H» (ترياج) جۇيەسىنىڭ جۇمىسىن ۇيىمداستىرۋ جانە ت. ب. ماسەلەلەرى دە تىلگە تيەك ەتىلدى.

الماتى قالاسىنىڭ مەملەكەتتىك باس سانيتارلىق دارىگەرى جانداربەك بەكشين مەديسينالىق ۇيىمدار قابىلداعان ەڭبەك قاۋىپسىزدىگى شارالارى بويىنشا جاعدايعا ەگجەي-تەگجەيلى تالداۋ جاساپ، باياندادى.

بۇگىندە الماتىدا 1320 توسەك-ورىنعا ارنالعان 7 جۇقپالى ستاسيونار جۇمىس ىستەيدى. اتاپ ايتقاندا، پروۆيزورلىق ەمدەۋگە جاتقىزۋ ءۇشىن 1164 توسەك-ورىنعا ارنالعان 12 ستاسيونار بەلگىلەندى.

№2 قالالىق پەرزەنتحانانىڭ باس دارىگەرى گ. نۇرلانوۆا، قالالىق كلينيكالىق جۇقپالى اۋرۋلار اۋرۋحاناسى (ءمودۋلدى اۋرۋحانا) فيليالىنىڭ مەڭگەرۋشىسى م. مۇقاشيەۆ، قالالىق بالالار كلينيكالىق جۇقپالى اۋرۋلار اۋرۋحاناسى باس دارىگەرىنىڭ م. ا. ە. اليبي، دارىگەر ءارى پسيحيكالىق دەنساۋلىق ورتالىعىنىڭ باس دارىگەرىنىڭ م. ا. ج. جولدىبايەۆانىڭ باياندامالارى تىڭدالدى.

كەڭەس قورىتىندىسى بويىنشا الماتى قالاسى اكىمىنىڭ ورىنباسارى ەرجان باباقۇماروۆ قوعامدىق دەنساۋلىق باسقارماسىنا مەديسينالىق ۇيىمدار مەن كارانتيندىك نىساندارداعى قورعاۋ رەجيمىن قامتاماسىز ەتۋدى ەرەكشە باقىلاۋعا الۋدى تاپسىردى. ال تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنە بۇل ماسەلەنى تۇراقتى باقىلاۋدا ۇستاۋ تاپسىرىلدى.