قالا كوشەلەرىندە كولىك پەن ادام سانى ازايعانىمەن، تازالىق جۇمىستارى مەن دەزينفەكسيالاۋ قارقىندى ءجۇرىپ جاتىر. بۇل تۋرالى almaty.tv حابارلادى. 

وعان كوممۋنالدىق قىزمەت كورسەتەتىن مامانداردى قوسقاندا 1500 ادام، سونداي-اق، 300-گە جۋىق ارنايى تەحنيكا جۇمىلدىرىلعان. شاhاردىڭ ءار اۋدانىندا 70 بريگادا دەزينفەكسيا شارالارىن جۇزەگە اسىرۋدا.

الماتىدا 8 مىڭ 500 تۇرعىن ءۇي، 23 مىڭ كىرەبەرىس پەن 4 مىڭنان استام اۋلا بار. وڭدەۋ جۇمىستارى اپتاسىنا ەكى مارتە جۇرگىزىلەدى. كۇنىنە شاھاردىڭ 33 پايىزى قامتىلادى. جاۋاپتى مامانداردىڭ ايتۋىنشا، دەزينفەكسيا جۇمىستارىنىڭ كەستەسى تۇرعىندارعا الدىن-الا حابارلانىپ جاتىر.      

– بۇگىنگى كۇنى ولار ۆەب-سايتتارعا جانە اۋداندىق اكىمدىكتەردىڭ الەۋمەتتىك جەلىلەردەگى رەسمي پاراقشالارىندا قولجەتىمدى. سونىمەن بىرگە، كىرەبەرىستەر مەن اقپاراتتىق ستەندتەردە ورنالاسقان. بارلىق تارتىلعان مەردىگەر ۇيىمدار ءتيىستى بىلىكتىلىككە، ەڭبەك رەسۋرستارىنا جانە ماتەريالدىق جابدىقتارعا يە. ورىندالعان جۇمىستارعا تۇرعىن ءۇي ينسپەكسياسىنىڭ وكىلدەرىنىڭ جانە اۋدان اكىمدىكتەرىنىڭ باقىلاۋىمەن باسقارۋ ورگاندارى، ياعني پاتەر يەلەرى كووپەراتيۆى وكىلدەرى نەمەسە ءۇي بويىنشا ۇلكەندەردى  قابىلدايدى، – دەدى قالالىق تۇرعىن ءۇي ساياساتى باسقارماسى باسشىسىنىڭ ورىنباسارى مەيىرجان وتىنشييەۆ.

بۇرىن حابارلانعانداي، قالا اكىمدىگى تۇرعىنداردى قولداۋ بويىنشا ءبىرقاتار شارالار قابىلدادى. اتاپ وتسەك،  سۋمەن جابدىقتاۋ جانە سۋ تارتۋ قىزمەتتەرىنە، جىلۋ جانە ىستىق سۋمەن جابدىقتاۋ، ەلەكتر ەنەرگياسى، گاز جانە تەلەفون بايلانىسىنا تولەم جاساۋعا ەشكىم ماجبۇرلەمەيدى. بۇل باستامانى ليفت ۇيىمدارى دا قولدادى. تۇرعىن ءۇي ساياساتى باسقارماسىنىڭ وكىلى وسى جونىندە دە ايتىپ ءوتتى.

– ولار قالا تۇرعىندارىنا ايىپپۇل سانكسيالارىن قولدانباي، ەكى ايعا (ناۋرىز، ءساۋىر) تولەمدى كەيىنگە قالدىردى. وسىعان بايلانىستى، بۇگىندە تۇرعىندار تاراپىنان كوممۋنالدىق تولەمدەردى كەيىنگە قالدىرۋ، جوندەۋ جانە قىزمەت كورسەتۋ اقىلارىنا دا قاتىستى ما دەگەن سۇراقتار ءجيى قويىلادى. تۇرعىن ءۇي ساياساتى باسقارماسى تاراپىنان اي سايىنعى جارنالار بولماعان كەزدە، باسقارۋ ورگاندارىنىڭ قىزمەتىن قامتاماسىز ەتۋ مۇمكىن ەمەستىگىن تۇسىندىرەمىز، – دەدى قالالىق تۇرعىن ءۇي ساياساتى باسقارماسى باسشىسىنىڭ ورىنباسارى مەيىرجان وتىنشييەۆ

قالا بيلىگى تەك الماتى ءىشىن عانا ەمەس، ىرگەلەس جاتقان الماتى وبلىسىنىڭ ادام كوپ جينالاتىن ورىندارىنا دا تۇراقتى زالالسىزداندىرۋ جۇمىستارىن جۇرگىزىپ وتىر. مىسالى، قورعانىس مينيسترلىگىنە قاراستى رادياسيالىق جانە حيميالىق قورعاۋ قىزمەتىنىڭ ماماندارى «التىن وردا» بازارىندا تۇراقتى تۇردە  اۋقىمدى دەزينفەكسيا جۇرگىزەدى.

– بۇگىنگى كۇندە الماتى قالاسىندا كارانتين جاريالانۋىنا بايلانىستى ق ر قارۋلى كۇشتەرىندە تەحنيكالار مەن ارنايى جابدىقتالعان قۇرالدارى قالاداعى عيماراتتار مەن كوشەلەرگە جۇمىلدىرۋدا. قالامىزدا ارنايى وڭدەۋ جۇمىستارى جۇرگىزىلىپ جاتىر. قۇرمەتتى قالا تۇرعىندارى، سىزدەردەن وتىنەرىمىز قالاعا كوپ شىقپاۋلارىڭىزدى سۇرانامىز!، – دەدى الماتى قالاسىنداعى اسكەري ينجەنەرلىك ينستيتۋتىنىڭ رادياسيالىق جانە حيميالىق قورعاۋ قىزمەتىنىڭ باسشىسى باقىتجان تەمىربايەۆ.

دەزينفەكسيالىق پرەپاراتتاردىڭ قۇرامىنا كەلەر بولساق، كىرە بەرىستەر مەن كوشەلەردى زالالسىزداندىرۋ ءۇشىن الما ەكسترا، سانلايت، سەپتوليت جانە كونسەپت سۇيىقتىقتارى شاشىلسا، كوشەلەر مەن كىرە بەرىستەرگە ناتريي گيپوحلوريتى، ال كولىك پەن ايالدامالالارعا دەزيتابس قولدانىدالدى.

قوعامدىق كولىكتەر ءار رەيس سايىن سوڭعى ايالدامادا تازالانىپ جاتىر. ۆيرۋسقا قارسى كۇرەسكە جاۋاپتى قالا ماماندارى كۇن سايىن 8 مىڭ كىرەبەرىس پەن مىڭعا جۋىق اۋلانى دەزينفەكسيالاۋعا قاۋقارلى. ول ءۇشىن 1500 ادام مەن 140 تازالۋشى كولىك تارتىلعان. ال، الماتى كوشەلەرىندەگى  سانيتارلىق جانە دەزينفەكسيالىق جۇمىستار ءۇشىن 120 مامان، 146 سۋ شاشقىش ارنايى تەحنيكا مەن 854 جۇمىسشى قىزمەت ەتىپ جاتىر.