الماتىدا ەگدە جاستاعى قارتتارعا تەگىن تاماق تاراتۋ اكسياسى جالعاسىپ جاتىر. بۇعان دەيىن 400-گە جۋىق 90 جاستان اسقان قارياعا ىستىق تاماق تاراتىلسا، ەندى مۇنداي قايىرىمدىلىق شارانىڭ اياسى ۇلعايىپ، 80-دەگى قارتتار دا ىستىق اسپەن قامتىلدى. بۇل تۋرالى almaty.tv حابارلادى. 

يگى ءىستى «نۇر وتان» پارتياسى مەن رەسپۋبليكالىق Nomad مما فەدەراسياسى قولعا العان.

ەلدىڭ قازىناسى سانالاتىن قاريالارعا كارانتين كەزىندە كوڭىل ءبولۋ ەسەلەنە تۇسكەن بۇگىندە. بيلىك تاراپى 65 جاستان اسقان ادامدارعا ۇيدە وتىرۋعا كەڭەس بەرسە، 80-نەن اسقان زەينەتكەرلەرگە دايىن ىستىق تاعام تاراتۋ جالعاسىپ جاتىر. يگى ىسكە «نۇر وتان» پارتياسى مەن Nomad مما فەدەراسياسى مۇرىندىق بولعان. ۇيىمداستىرۋشىلار بۇعان دەيىن 400-گە جۋىق 90-داعى قارياعا قامقورلىق جاساسا، ەندى تەگىن تاماقپەن 80-نەن اسقان زەينەتكەرلەر دە قامتىلۋدا.  مىڭعا جۋىق قارتقا كۇندەلىكتى ىستىق اس جەتكىزىلىپ وتىرادى. بۇل سانداردىڭ كولەمى كۇن وتكەن سايىن ۇلعايىپ جاتىر دەيدى.

– مۇنداي قايىرىمدى ءىستى كورگەن باسقا جولداستارىمىز دا ءوز ۇلەستەرىن قوسىپ جاتىر. سوندىقتان دا ءبىز كومەك بەرەتىن قارتتاردىڭ كولەمىن ۇلعايتتىق. كۇندە تىزىمگە 200-300 ادامنان قوسىپ جاتىرمىز. كوروناۆيرۋس جۇقتىرعانداردىڭ سانى ارتۋىنا بايلانىستى ءبىز قاۋىپسىزدىككە، تازالىققا ءجىتى ءمان بەرەمىز. سول سەبەپتى بۇعان دەيىن ەرىكتىلەرمەن جۇمىس ىستەگەن بولساق، ەندى تاعامداردى جەتكىزۋ ءۇشىن كاسىبي كۋرەرلەردى تارتىپ، قويان-قولتىق جۇمىس اتقارىپ جاتىرمىز، – دەدى رەسپۋبليكالىق Nomad MMA فەدەراسياسىنىڭ پرەزيدەنتى گادجي گادجييەۆ.

قاريالارعا بەرىلەتىن تاعامداردىڭ قۇرامى مەن دايىندالۋ ساپاسىنا دا ەرەكشە كوڭىل بولىنەدى دەيدى مۇنداعىلار. قارتتارعا كۇندەلىكتى تاماقتى بۇعان دەيىن «جاس وتان» جاستار قاناتىنىڭ ەرىكتىلەرى تاراتاتىن. ەندى بۇل مىندەت كاسىبي كۋرەرلەرگە جۇكتەلىپتى.

كۋرەرلەر كۇندە وسىنداي تەكسەرىستەن ءوتىپ، سانيتارلىق تازالىقتار ەرەكشە ساقتالادى. جەتكىزۋشى ماماندار بارلىق جەكە گيگيەنالىق كيىمدەرمەن قامتىلىپتى. قاۋىپسىزدىك جانە تازالىق شارالارى تاپتىشتەپ تۇسىندىرىلگەن. بارلىق سانيتارلىق شارالار جاسالعاننان كەيىن عانا دايىن بولعان تاماقتار كۋرەرلەردىڭ قولىنا تىپسىرىلادى.

بۇگىن 750 تۇسكى اس قارتتاردىڭ ۇيىنە دەيىن جەتكىزىلدى. 

سونداي-اق، تاعامداردى بۋىپ-تۇيەتىن ادامدار، ءتىپتى دايىن استى جەتكىزەتىن جۇرگىزۋشىلەردىڭ دە تازالىعى قاتاڭ نازاردا. بۇل يگى باستاما ەلىمىزدىڭ وزگە دە وڭىرلەرىندە قولعا الىنا باستاپتى. ماسەلەن، قاراعاندى، اتىراۋ، اقمولا سياقتى وبلىستاردا ءدال وسىنداي اكسيا جالعاسىن تاۋىر جاتىر.