الماتى قالاسىنىڭ اكىمى باقىتجان ساعىنتايەۆ تۇرعىنداردىڭ دەنساۋلىعى ءۇشىن كۇرەس ءتۇرلى باعىت بويىنشا جۇرگىزىلىپ جاتقىنىن اتاپ ايتتى. بۇل تۋرالى instagram پاراقشاسىندا جازدى.
– دارىگەرلەر ىندەتتى جۇقتىرعانداردى جانە ولارمەن بايلانىستا بولعانداردى انىقتاپ، ناۋقاستاردى ەمدەپ، ولاردى سابىرعا شاقىرۋدا. پوليسەيلەر مەن اسكەري قىزمەتكەرلەر، سانەپيدەميولوگتار كارانتين رەجيمىن قاداعالاۋدا. كوممۋنالدىق قىزمەتتەر قالانى جىلۋمەن، سۋمەن، گاز جانە ەلەكتر قۋاتىمەن قامتاماسىز ەتەتىن كاسىپورىنداردىڭ ۇزدىكسىز جۇمىسىن قامتاماسىز ەتۋدە. دەزينفەكسيالىق بريگادالار كوشەلەر مەن الاڭداردى زالالسىزداندىرىپ ءجۇر، – دەدى ب. ساعىنتايەۆ.
سونىمەن قاتار بارلىق جۇمىستى توتەنشە جاعداي رەجيمىن قامتاماسىز ەتۋ جونىندەگى جەدەل شتاب ۇيلەستىرىپ وتىرعانىن جانە اعىمداعى بارلىق جاعداي بويىنشا اقپارات ءتۇسىپ وتىرعانىن اتاپ ءوتتى.
– كۇندەلىكتى تىرشىلىكتى قامتاماسىز ەتەتىن بارلىق جۇيەلەردىڭ قالىپتى جۇمىسى ءۇشىن تاۋلىك بويى ءتۇرلى شەشىمدەر ازىرلەنىپ، قابىلدانادى. سونىڭ ىشىندە ازىق-تۇلىك پەن مەديسينالىق بۇيىمداردى ۋاقىتىلى جەتكىزۋ ماسەلەسى تۇر. «وپەن الماتى» بازاسىندا 1308 ءنومىرى بويىنشا كولل-ورتالىق جۇمىس ىستەيدى. مۇندا پسيحولوگتاردىڭ دا كومەگىنە جۇگىنۋگە بولادى. بۇل ورتالىققا 16 ناۋرىزدان باستاپ 130 مىڭنان استام قوڭىراۋ كەلىپ تۇسكەن، – دەدى شاھار باسشىسى.
پىكىر قالدىرۋ