ەلىمىزدەگى ءاربىر اۋلەتكە ءوزىنىڭ قايعىلى ءىزىن قالدىرعان 1941-1945 جىلدارداعى سۇم سوعىستاعى جەڭىسكە بيىل 75 جىل. قان مايدانعا 1 ملن 200 مىڭنان استام وتانداسىمىز اتتانىپ، سونىڭ جارتىعى عانا ۇيىنە ورالدى. جەڭىستى جاقىنداتۋعا سۇبەلى ۇلەس قوسىپ، كەۋدەسىن وققا توسقان ارداگەرلەردىڭ ءبىرى – دۇيسەن وسپانوۆ.
ول 1923 جىلى جامبىل وبلىسى لۋگوۆوي اۋدانىندا دۇنيەگە كەلگەن. 1941 جىلى لۋگوۆوي اۋداندىق اسكەري كوميسسارياتىنان سوعىسقا اتتانعاندا جاسى 18-گە ەندى تولعان ەدى. مايدانگەر جاسپىن دەمەستەن قولىنا قارۋ الىپ، وتانىن قورعاۋعا ەش ويلانباستان كەتە باردى.
دۇيسەن وسپانوۆ 68-اسكەر 192-ديۆيزيا 490-جەكە پولك ساپىندا كىشى كوماندير، كىشى سەرجانت رەتىندە بەلورۋسسيا جەرىندەگى كەسكىلەسكەن ۇرىستارعا ارالاسىپ، 50 ميلليمەتر كاليبرلىك مينومەنتپەن قۇرالايدى كوزگە اتقان مەرگەندەردىڭ ءبىرى اتاندى.
1943 جىلى بەلورۋسسيا جەرى سمولەنسك وبلىسىنداعى ۇرىستا جارالانىپ، ەلگە قايتتى. وتانىنا ورالىسىمەن ءوزى تۋىپ-وسكەن لۋگوۆوي اۋدانىندا ءتۇرلى قىزمەتتەردە جەمىستى ەڭبەك ەتتى. كوممۋنيستىك پارتياعا ءوتىپ، قالعان عۇمىرىن تۋعان جەرىندە ادال قىزمەت قىلۋعا ارنادى.
1944-1949 جىلدارى اۋداندىق ەڭبەكشى كەڭەسىندە كادر ءبولىمى مەڭگەرۋشىسىنىڭ حاتشىسى، 1949-1955 جىلدار ارالىعىندا لۋگوۆوي اۋىلدىق ەڭبەكشى كەڭەسىنىڭ ءتوراعاسى، 1955-1958 جىلدارى پارتيانىڭ لۋگوۆوي اۋداندىق كوميتەتىنىڭ نۇسقاۋشىسى، 1959-1963 جىلدارى لۋگوۆوي اۋداندىق الەۋمەتتىك قامتۋ ءبولىمىنىڭ مەڭگەرۋشىسى، 1963-1964 جىلدارى شۋ قالالىق الەۋمەتتىك قامتۋ ءبولىمىنىڭ مەڭگەرۋشىسى، 1966 جىلدان لۋگوۆوي اۋدانىندا ەكونوميست قىزمەتتەرىن اتقارعان.
ارداگەردىڭ مايدانداعى ەرلىگى لايىقتى باعالانىپ، ءتۇرلى ماراپاتتار بەرىلگەن. سولاردىڭ ءبىرى – "ۇلى وتان سوعىسىنا قاتىسقانى ءۇشىن" مەدالى.
قان مايدانداعى جەڭىستى دۇيسەن وسپانوۆتاي مايدانگەرلەردىڭ قايسارلىعى مەن ەرلىگى، وتانسۇيگىشتىگى مەن باتىرلىعى جاقىنداتتى. ولاردىڭ جاۋىنگەرلىك جولى مەن عيبراتتى عۇمىرى بۇگىنگى ۇرپاققا ءارقاشان ۇلگى.
پىكىر قالدىرۋ