18 جاسىندا سوعىسقا اتتانعان كولباي ءاناپيا ۇلى وتكەن عاسىرداعى كورگەن قيىندىقتارىن ەسكە الىپ، ەندىگارى مۇنداي ناۋبەتتىڭ قايتالانبايتىنىنا تىلەكتەستىك ءبىلدىردى.

كولباي ءاناپيا ۇلى 1926 جىلى 13 ماۋسىمدا جامبىل وبلىسى، مەركى اۋدانى، سۇرات اۋىلىندا دۇنيەگە كەلگەن. ارداگەرگە 1944 جىلى سوعىسقا شاقىرتۋ كەلىپ، سەمەي قالاسىندا پولكتاعى سوعىس ءتاسىلىن ۇيرەنۋ ءۇشىن 6 اي وقۋ-جاتتىعۋ جيىنىندا بولعان. ەكىنشى بەلارۋس مايدانى 12-گۆارديا ديۆيزياسىنىڭ 197-پولكىندە مينومەتشى بولىپ سوعىسقا قاتىسقان.

– سوعىستا وزىممەن بىرگە 2 قازاق عانا بولدى. سۇراپىل سوعىس وتە قيىن بولدى. سناريادتار، بومبالار جارىلعاندا قاتتى قۇلاپ تۇسكەنىم ەسىمدە، اللانىڭ قالاۋىمەن ەلىمە امان-ەسەن ورالدىم. جەڭىستى قارسى العان ساتتەگى قۋانىش جادىمدا ماڭگىلىككە ۇمتىلماستاي جاتتالىپ قالدى، – دەيدى ك. ءاناپيا ۇلى.

ارداگەر بارشا قازاقستاندىقتاردى ۇلى جەڭىستىڭ 75-جىلدىعىمەن قۇتتىقتاپ، قارجىلاي كومەك كورسەتىپ جاتقان ۇكىمەتكە العىسىن ايتتى.

– ۇلى جەڭىستىڭ 75-جىلدىعى قۇتتى بولسىن. ەلىمىزدە تىنىشتىق بولسىن، قازاق ەلى امان بولسىن. ناۋرىز ايىندا باستالعان ءقاۋىپتى ىندەتكە قاراماستان ۇكىمەت تاراپىنان ۇلى وتان سوعىسى ارداگەرلەرىنە كوپتەگەن قارجىلاي كومەك كورسەتىلىپ، سىيلىقتار بەرىلىپ جاتىر. وسى تۇستا ءبىزدى ەلەپ-ەسكەرىپ، قۇتتىقتاپ جاتقاندارىنا العىسىم شەكسىز! اللانىڭ قالاۋىمەن قازىرگى ۋاقىتتا بالالارىمنىڭ، نەمەرەلەرىمنىڭ قامقورلىعىنىڭ ارقاسىندا ءومىر ءسۇرىپ جاتىرمىن. بارشاڭىزعا كوپ راقمەت!، – دەپ ارداگەر العىسىن ءبىلدىردى.