جەڭىس كۇنىنىڭ 75 جىلدىعىنا وراي قامشى ءتىلشىسى الماتى قالاسىنداعى بىرنەشە سوعىس ارداگەرىنە حابارلاسىپ، اتاۋلى كۇنمەن قۇتتىقتادى. سولاردىڭ ءبىرى قاشاعانوۆ نۇرتايدىڭ قىزى اكەسىنىڭ جاعدايى جاقسى ەكەنىن، ەرلىگى ەلەۋسىز قالماعانىن ايتتى. 

قاشاعانوۆ نۇرتاي 1926 جىلى 15 مامىردا الماتى وبلىسى پانفيلوۆ اۋدانى شورالى اۋىلىندا دۇنيەگە كەلگەن. 1932-1936 جىلدار ارالىعىندا شورالى اۋىلىنداعى باستاۋىش سىنىپتى، كەيىن ينتەرناتتا 7-سىنىپتى ءبىتىرىپ شىعادى. وتباسىلىق جاعدايلارعا بايلانىستى 7-سىنىپتان كەيىن وقۋىن جالعاستىرا الماي، ەڭبەككە ەرتە جاستان ارالاسادى. سوعىس باستالعان جىلى ول اۋىلدا قارا جۇمىس ىستەپ جۇرگەن.

1943 جىلى اسكەر قاتارىنا قوسىلۋعا ءوتىنىش بەرەدى. كەيىن پەتروپاۆل قالاسىندا كىشى سەرجانتتاردى دايىندايتىن ارنايى مەكتەپكە قابىلدانادى. مەكتەپتى ەڭ قىسقا مەرزىمدە اياقتاپ، 1943 جىلدىڭ قاراشا ايىندا سوعىسقا اتتانادى.

ول ءبىرىنشى  جانە ەكىنشى بەلارۋس مايدانىنا قاتىسقان. سوعىستا كورسەتكەن ەرلىگى ءۇشىن قىزىل جۇلدىز وردەنىمەن ناگرادتالادى. 1944 جىلدارى بالتىق رەسپۋبليكالارىن ازات ەتۋگە قاتىسادى.

جەڭىس كۇنى ول قازىرگى سانكت-پەتەربۋرگ بۇرىنعى لەنينوگراد قالاسىندا اۋرۋحانادا بولعان. كەيىن 1946 جىلى ەلگە ورالادى.

1950-1953 جىلدارى الماتى قالاسىنداعى پانفيلوۆ پەدوگوگتيكالىق ۋچيليششەسىندە وقيدى. كەيىن شورالى اۋىلىنداعى مەكتەپتەردىڭ بىرىندە ءمۇعالىم بولىپ قىزمەت اتقارادى. كوپ جىلدار باستاۋىش سىنىپ ءمۇعالىمى بولعاننان كەيىن، 1959-1964 جىلدار ارالىعىندا الماتى قالاسىنداعى قازاق مەملەكەتتىك ۋنيۆەرسيتەتىنىڭ تاريح فاكۋلتەتىنە وقيدى. وقۋدى اياقتاعاننان كەيىن شورالى اۋىلىنداعى مەكتەپتە ۇستازدىق قىزمەتىن جالعاستىرادى.  

– اكەمنىڭ ەرلىگى ەلەۋسىز قالىپ جاتقان جوق. ەلباسىنىڭ جىل سايىنعى قۇتتىقتاۋلارى دا ءالى كۇنگە دەيىن ساقتاۋلى. كەشە دە اۋەزوۆ اۋدانىنىڭ اكىمى پرەزيدەنتىمىز قاسىم-جومارت توقايەۆ پەن الماتى قالاسىنىڭ اكىمى باقىتجان ساعىنتايەۆتىڭ ارنايى قۇتتىقتاۋ قاعازىن ۇيگە كەلىپ تابىس ەتتى. اكەم ءقازىر 94 جاستا. بۇكىل قازاقستاندىقتاردى، الماتىلىقتاردى جەڭىستىڭ 75 جىلدىعىمەن قۇتتىقتايمىن. ءبىزدىڭ اكەلەرىمىز بەن اتالارىمىزدىڭ ءبىز ءۇشىن، قازىرگى بەيبىت ءومىر ءۇشىن ءوز جانىن قۇربان ەتتى. بەيبىت كۇننىڭ ءقادىرىن بىلەيىك. كەلەشەگىمىزدىڭ جارقىن بولۋىن تىلەيمىن، – دەيدى قاشاعانوۆا بەيبىت نۇرتاي قىزى.