الماتى قالاسىنىڭ ناۋرىزباي اۋدانىندا تۇرعىندارعا ارنالعان دەمالىس ورىندارى كوپ بولادى. بۇل تۋرالى الماتى قالاسى اكىمىنىڭ ورىنباسارى مۇحيت ازىربايەۆ ناۋرىزباي اۋدانىنداعى «جۇمىسپەن قامتۋدىڭ جول كارتاسى» مەملەكەتتىك باعدارلاماسى بويىنشا بوي كوتەرەتىن نىسانداردى ارالاۋ بارىسىندا مالىمدەدى.

مۇحيت ازىربايەۆ ءبىرىنشى كەزەكتە «قارعالى» ىقشاماۋدانىنداعى وزەن ارناسىن قاراپ شىقتى. وندا تۇرعىن ۇيلەردى سۋ باسپاۋى ءۇشىن كانالداردى قالپىنا كەلتىرۋ، سونداي-اق، جاياۋ جۇرگىنشىلەر تروتۋارلارىن ورناتۋ، بالالار مەن سپورت الاڭدارىن سالۋ جانە ەسكىلەرىن جاڭالاۋ، سىرتقى جارىقتاندىرۋ جەلىلەرىن جۇرگىزۋ، كوگالداندىرۋ جۇمىستارى جۇرگىزىلۋدە.

– بۇل اۋداننىڭ قالاعا قوسىلعانىنا كوپ بولا قويعان جوق. مۇندا جەكە تۇرعىن ءۇي قۇرىلىسى نىساندارى كوپ، ال بالالار مەن سپورت الاڭدارى، تۇرعىنداردىڭ دەمالاتىن ورىندارى تىم از. اۋدان حالىقتىڭ يگىلىگى ءۇشىن وسىنداي ورىنداردى تۇرعىزۋ ماقساتىندا جاقسى دايىندالدى، ەگەر ءبىز ويىمىزداعىنى تۇگەل ءساتتى جۇزەگە اسىراتىن بولساق، وندا مۇندا تۇرعىنداردىڭ سەرۋەندەۋىنە، جايلى ءومىر سۇرۋىنە، ۋاقىتىن ءتيىمدى وتكىزۋىنە ارنالعان دەمالىس ورىندارى كوپ بولادى. ال ءقازىر ءبىز بولاشاقتا وسى جۇمىستاردى قولعا الاتىن مەردىگەرلەردىڭ وسى اۋداننىڭ قاي جەرىنە قانداي دەمالىس ورىندارىن سالۋ كەرەكتىگىن ناقتىلاپ، تاعى ءبىر پىسىقتاپ جاتىرمىز، – دەدى مۇحيت ازىربايەۆ.

سونداي-اق، م. ازىربايەۆ ساپار بارىسىندا ناۋرىزباي اۋدانىنىڭ اكىمشىلىك كەشەنى اۋماعىنداعى جوندەلىپ جاتقان سكۆەردىڭ، «قالقامان» شاعىناۋدانىنداعى جاياۋ جۇرگىنشىلەردىڭ سەرۋەندەۋىنە ارنالعان ايماقتىڭ جۇمىستارىمەن تانىستى.