الماتىدا، شەكتەۋ شارالارىن جەڭىلدەتۋ شەڭبەرىندە، 1 ماۋسىمنان باستاپ، سپا-سالوندارى، قوعامدىق مونشالار جانە ساۋنالار جۇمىستارىن قايتا باستايدى. بۇل تۋرالى قالا اكىمدىگىنىڭ باسپا ءسوز قىزمەتى حابارلادى.

نىساندارعا بارلىق ەپيدەميولوگيالىق شارالاردى قاتاڭ ساقتاعان جاعدايدا رۇقسات ەتىلەدى.

جۇمىستى باستاردا ۇيىمدار الماتى قالاسىنىڭ باس مەملەكەتتىك سانيتاريالىق دارىگەرى قاۋلىسىنىڭ ەرەجەلەرىمەن تانىسۋى جانە نىسانداردى بارلىق قاجەتتى تالاپتارعا سايكەس دايىنداۋى ءتيىس. تالاپتار: جايلاردا كۇشەيتىلگەن سانيتاريالىق-دەزينفەكسيالىق رەجيمدى، الەۋمەتتىك قاشىقتىقتى ساقتاۋ جانە ت.ب.

سونداي-اق، نىساندار infokazakhstan.kz سايتىنا تىركەلۋگە ءتيىس. وندا ولار وزدەرىنىڭ ازىرلىگىن راستايدى جانە حابارلاماعا ەلەكتروندى-سيفرلىق قولتاڭباسىمەن قول قويۋ جولىمەن جازىلعان نورمالاردى ساقتاۋعا كەپىلدىك بەرەدى.

ءارى قاراي، كارانتيندىك شارالاردى ورىنداۋ بارىسىن مونيتورينگتىك توپ رەيدتىك تەكسەرۋلەر جۇرگىزۋ ارقىلى قاداعالايتىن بولادى. تالاپتاردى بۇزعان جاعدايدا، نىسانداردى تولىق جابىلادى.

جۇمىس ورىندارىنا تىكەلەي قاجەتتى قىزمەتكەرلەر سانىن كاسىپورىن باسشىلارى وزدەرى بەلگىلەيتىنىن قوسىمشا حابارلايمىز. سۇلۋلىق جانە دەنساۋلىق يندۋسترياسىنىڭ نىساندارى ءۇشىن جۇمىس كەستەسى شتات رەجىمىندە قالىپ وتىر.

جالپى العاندا، 7،2 مىڭ ادام سانىمەن 900-دەن استام نىسان جۇمىسىن قايتا باستايدى دەپ كۇتىلۋدە.