دۇنيەجۇزىلىك دەنساۋلىق ساقتاۋ ۇيىمىنىڭ (ددسۇ) باسشىسى تەدروس گەبرەيسۋس الەمنىڭ كوپتەگەن ەلدەرى COVID-19-بەن كۇرەستە دۇرىس باعىت ۇستانبادى دەپ ەسەپتەيدى. بۇل تۋرالى reuters اگەنتتىگى حابارلادى. 

ونىڭ ايتۋىنشا، دۇنيەجۇزىندە جاقىن ارادا قالىپتى جاعداي ورناي قويمايدى. 

گەبرەيسۋس پروگرەسكە قاراماستان، جاھاندىق دەڭگەيدە پاندەميا قارقىن الىپ كەلە جاتقانىن اتاپ ءوتتى. ونىڭ پىكىرىنشە، جاعداي ءالى دە ناشارلايدى. 

كوروناۆيرۋس 2019 جىلدىڭ سوڭىندا قىتايدىڭ ۋحان قالاسىندا پايدا بولدى. 11 ناۋرىزدا ددسۇ كوروناۆيرۋس ىندەتىن رەسمي تۇردە عالامدىق پاندەميا دەپ جاريالادى.

وسى ۋاقىتقا دەيىن الەمدە 13،2 ملن ادام كوروناۆيرۋس  جۇقتىردى، قايتىس بولعاندار سانى – 574 مىڭ 671 ادام .

ۆيرۋستىڭ تارالۋى بويىنشا اقش كوش باستاپ كەلەدى. بۇل ەلدە 3،5 ميلليونعا جۋىق ادام COVID-19 جۇقتىرعان، قايتىس بولعاندار 138 مىڭنان استى. ەكىنشى ورىندا برازيليا تۇر. بۇل ەلدە 1،88 ميلليون ادام ۆيرۋس جۇقتىرعان، ولاردىڭ 72 مىڭنان استامى ءولدى. ال ءۇندىستاندا 878 مىڭ ادام ۆيرۋس جۇقتىرعان، 553 مىڭى ەمدەلىپ، 23 مىڭنان استامى قايتىس بولعان.