كۆازيمەملەكەتتىك سەكتور سۋبەكتىلەرىن قۇرۋعا جاريالانعان موراتوريي ۇزارتىلادى. بۇل تۋرالى پرەزيدەنت قاسىم-جومارت توقايەۆ "التىن ساپا" كونكۋرسىنىڭ جەڭىمپازدارىن ماراپاتتاۋعا ارنالعان ونلاين شارادا ايتتى. 

مەملەكەت باسشىسى پاندەميا مەن الەمدىك ەكونوميكالىق داعدارىسقا قاراماستان، 11 ايدىڭ قورىتىندىسى بويىنشا وڭدەۋ ونەركاسىبىندەگى ءوسىم 3،3 پروسەنت دەڭگەيىندە ساقتالىپ وتىرعانىن ەرەكشە اتاپ ءوتتى.

– بيىلعى 1 قاڭتاردان باستاپ مەنىڭ جارلىعىممەن شاعىن جانە ميكرو كاسىپكەرلىك سۋبەكتىلەرىن تەكسەرۋگە الداعى ءۇش جىلعا موراتوريي ەنگىزىلدى. مەنىڭ تاپسىرمام بويىنشا ۇكىمەت پەن ۇلتتىق پالاتا رەتتەۋ ساياساتىنىڭ جاڭا ادىستەرىن ازىرلەۋگە كىرىسىپ كەتتى. كەلەسى جىلدان باستاپ قازىرگى تالاپتاردى قايتا قاراۋ جانە «جاڭادان رەتتەۋ» قاعيداتىن ەنگىزۋ جونىندەگى زاڭنامالىق نورمالار بىرتىندەپ قابىلداناتىن بولادى. بۇل بيزنەستى «اقىلدى رەتتەۋدىڭ» تۇبەگەيلى جاڭا جۇيەسىن قالىپتاستىرا وتىرىپ، ماڭىزدى ەمەس ەرەجەلەر مەن قايتالاناتىن تالاپتاردى الىپ تاستاۋعا مۇمكىندىك بەرەدى، – دەدى قاسىم-جومارت توقايەۆ.   

پرەزيدەنت ەكونوميكانى مەملەكەت مەنشىگىنەن ودان ءارى الۋ ءىسى ناقتى باسەكەلەستىكتى دامىتۋدا جانە ءار كاسىپكەرگە شىن مانىندە تەڭ مۇمكىندىك بەرۋدە ماڭىزدى ءرول اتقاراتىنىن ايتتى.

– ءبىز مەملەكەتتىڭ ەكونوميكاعا ارالاسۋ ۇلەسىن ايتارلىقتاي ازايتۋ ءۇشىن بىرتىندەپ جاعداي جاسايمىز. بيىل كۆازيمەملەكەتتىك سەكتور سۋبەكتىلەرىن قۇرۋعا جاريالانعان موراتوريي اياقتالادى. بۇل باعىتتاعى ماقساتقا ءالى تولىق قول جەتكىزىلگەن جوق دەپ سانايمىن. سوندىقتان مەنىڭ جارلىعىممەن اتالعان موراتوريي كەلەسى جىلدىڭ اياعىنا دەيىن سوزىلادى. مەملەكەت وڭتايلى بيزنەس ورتا قالىپتاستىرۋدان بولەك، ەلىمىزدەگى كاسىپكەرلىكتى جان-جاقتى دامىتۋ ءۇشىن جۇيەلى شارالار قابىلداماق، – دەدى مەملەكەت باسشىسى.

مەملەكەت باسشىسى پاندەميا كەزىندە بيزنەس نەسيەلەردى قايتارۋ مەرزىمىن شەگەرۋگە مۇمكىندىك العانىن جانە سالىقتان بوساتىلىپ، باسقا دا جەڭىلدىكتەر مەن ارتىقشىلىقتارعا يە بولعانىن اتاپ ءوتتى. كورسەتىلگەن قولداۋدىڭ جالپى كولەمى 1،5 تريلليون تەڭگەدەن اسقان.