بيىل زەينەتكەرلەرمەن قوسا جاقىندا عانا جاساقتالعان "ا" كورپۋسىنا كىرەتىن مەملەكەتتىك قىزمەتشىلەردىڭ دە جالاقىلارى وسەدى.

تەك شەنەۋنىكتەردىكى الدەقايدا كوپ، 50 پايىزعا كوتەرىلمەك. بۇل جەمقورلىقتى جويۋ ءۇشىن جاسالىپ وتىرعان جوسپار. الايدا، حالىق پەن ساراپشىلار "ايلىعى ەسەلەنگەن شەنەۋنىكتەر ەندى پارا المايدى، دەگەنگە سەنبەي وتىر. ويتكەنى، ءسىڭىسىپ كەتكەن بۇل جۇيەنى بۇزۋ ءۇشىن زاڭ مەن جازانى قاتاڭداتۋ كەرەك، دەيدى تۇرعىندار.

"ا" كورپۋسىنداعى شەنەۋنىكتەر ءۇشىن كەلە جاتقان جىلقى جىلىنىڭ جەمىستى بولاتىن ءتۇرى بار. جاڭا جىلدان باستاپ ولاردىڭ جالاقىسى بىردەن ەلۋ پايىزعا كوبەيمەك.

ال حالىق "ەليتا" دەپ اتاپ جۇرگەن "ا" كورپۋسىنا كىمدەر كىرەدى؟ ەڭ الدىمەن پرەزيدەنت ىستەرى باسقارماسى، ەسەپ جانە ورتالىق سايلاۋ كوميتەتتەرى، ونان سوڭ پرەمەر-مينيستردىڭ كانسەليارياسى، وبلىس اكىمى اپپاراتىنىڭ جەتەكشىلەرى مەن قالا، اۋدان اكىمدەرى جانە تاعى باسقالارى. ياعني، كىلەڭ باسقارۋشىلار. ەلىمىزدە وسىنداي 1124 ادام بار.

ولار بيىل سىناق تاپسىرىپ، بىلىكتىلىكتەرىن دالەلدەپ شىقتى. سوعان سايكەس تاباتىن تابىستارى دا جامان ەمەس.ال پرەزيدەنت ايتقان وزگەرىس ەنگىزىلەتىن بولسا، جاعدايلارى بىلايشا وزگەرمەك. "ا" كورپۋسىنداعىلاردىڭ ورتاشا جالاقىسىن ماسەلەن 200 مىڭ تەڭگە دەپ الساق، 1-قاڭتاردان باستاپ ايلىقتارى 300 مىڭ تەڭگەگە دەيىن جوعارىلايدى. 50 پايىزدىق ۇستەمە،ياعني 100 مىڭ تەڭگە.

"ا" كورپۋسىنا قاتىسى جوق، ساياسي تۇلعالار بولسا جالاقىنىڭ جوعارىلاۋى - جەمقورلىققا قارسى بىردەن-بىر ءدارۋ بولادى دەپ وتىر.

"جاقسى ءبىر ءسوز ەسىمە ءتۇسىپ تۇر. ەگەر ءتارتىپ ساقشىسى مەن دارىگەرلەردىڭ قارنى توق بولماسا، مەملەكەتتىڭ ىرگەسى بەرىك بولمايدى دەگەن"،- دەيدى ق ر توتەنشە جاعدايلار ءمينيسترى ۆلاديمير بوجكو.

مەملەكەتتىك قىزمەت ىستەرى جونىندەگى اگەنتتىك باسشىسى ءاليحان بايمەنوۆ ءۇشىن دە شەنەۋنىكتىڭ قارنى توق بولماسا، جەمقورلىقپەن كۇرەسۋ وڭاي بولمايدى.

"الەمدىك تاجىريبە كورسەتكەندەي مەملەكەتتىك قارجىنى جۇمساۋ تۋرالى ينۆەستيسيالار، مەملەكەتتىك ساتىپ الۋلار تۋرالى بەلگىلى ءبىر دەڭگەيدە جالاقىسى بولماسا جەمقورلىقپەن كۇرەسۋ قيىن.دەسە دە، بۇل جەمقورلىقتان ارىلۋدىڭ ءبىر فاكتورى"، - دەيدى ق ر مەملەكەتتىك قىزمەت ىستەرى اگەنتتىگىنىڭ ءتوراعاسى ءاليحان بايمەنوۆ.

جالاقىنىڭ جوعارىلاۋى جەمقورلىقتى جەڭە المايدى دەيتىندەر دە كوپ.

"جەمقورلىقتىڭ الدىن الۋ تەك قانا شەنەۋنىكتەردىڭ جالاقىسىن كوتەرۋمەن شەشىلەتىن ماسەلە ەمەس، بىرىنشىدەن، ەكىنشىدەن، ەندى ونسىز دا جالاقىسى جوعارى توپتىڭ جالاقىسىن جارتىلاي ءوسىرۋ قالعاندارىنىڭ جالاقىسىن وسىرمەي تۇرىپ ءوسىرۋ بۇل جەردەن قيسىندى كورىپ وتىرعان جوقپىن"، - دەيدى ساياساتتانۋشى راسۋل جۇمالى.

قاراپايىم حالىق تا بۇل جولدىڭ جەمقورلىقتى جوياتىنىنا سەنبەيتىن بولىپ شىقتى.  تۇرعىنداردىڭ پىكىرىنشە، الىپ ۇيرەنىپ قالعان قول الا بەرەتىن سەكىلدى.

"بۇل باستاما راسىندا دا قوعام بولىپ كۇرەسە الماي جاتقان جەمقورلىققا تۇساۋ سالۋى مۇمكىن. كەزىندە مەنەن دە پارا سۇراعاندار بولعان. بۇل - جاقسى بەتبۇرىس. كوپتىك ەتپەيدى، ۇستىنە 50 پايىز قوسىلادى. پارا سۇراعاندار كەزدەسەدى، ءبىراق وعان جول بەرىلمەيدى"، - دەيدى مەملەكەتتىك قىزمەتتە جۇمىس ىستەيتىن مومىش ماحمەتوۆ. .

ايتا كەتەيىك، وسىعان دەيىن ەلىمىزدە سۋديالاردىڭ دا جالاقىسى 60 پايىزعا كوتەرىلگەن بولاتىن. سونان جەمقورلىق جويىلادى دەپ جوسپارلانعان. ءبىراق، سوعان قاراماستان سۋديالاردىڭ جىل سايىن ۇش-تورتەۋى پارامەن ۇستالىپ، ال ون شاقتىسى قىزمەتىنەن قۋىلسا، تاعى قىرىق شاقتىسى تارتىپتىك جازاعا تارتىلادى ەكەن. بۇل جاڭاشىلدىقتىڭ ەندى "ا" كورپۋسىندا قانداي سيپات الاتىنى تەك ۋاقىتتىڭ ەنشىسىندە.

دەرەككوز: news.nur.kz