بۇگىن، 4 اقپاندا بەلسەندى ماكس بوقايەۆ تۇرمەدەن شىقتى، دەپ حابارلادى azh.kz سايتى. 

سايت مالىمەتىنشە، ماكس بوقايەۆ تۇزەۋ كولونياسىنان تاڭعى ساعات 6:00-دە شىققان. ونى الدىنان جاقتاستارى مەن ب ا ق وكىلدەرى قارسى العان.

بوقايەۆتىڭ ايتۋىنشا، تاڭەرتەڭ ەرتە باراققا قىلمىستىق-اتقارۋ جۇيەسى كوميتەتى (قاج) قىزمەتكەرلەرى كۇتپەگەن جەردەن كەلىپ، بىرگە سىرتقا شىعۋ كەرەگىن ايتقان.

اzh.kz اقپاراتىنا سايكەس، بۇل ساياسي بەلسەندىنى بوساتۋ توڭىرەگىندە دۇربەلەڭ تۋعىزباۋ ءۇشىن جانە بوقايەۆتى كولونيا الدىندا قارسى العىسى كەلەتىن ادامداردى جيناماۋ ءۇشىن جاسالعان.

– حالىقتىڭ قولداۋى بولماعان جاعدايدا مەنى جوق قىلىپ جىبەرەتىن ەدى. سۇيەگىمدى تابا المايتىن ەدىڭدەر. راقمەت سول ءۇشىن! راقمەت، حالايىق! ايتايىن دەگەنىم، ءقازىر تەلەديداردان، راديودان، گازەتتەردەن جاعدايدى قاراپ وتىرمىن عوي. نازاربايەۆ تاقتان كەتسە دە 5 ميليمەتر عانا وزگەرىس بار. الىپ بارا جاتقان وزگەرىس جوق. ءارى قاراي قوعامدىق جۇمىستاردى جالعاستىرا بەرەمىن. ماعان تىيىم سالسا دا جالعاستىرامىن. 10 جىل بويى قوعامدىق جۇمىستا ءجۇرمىن. مەنىڭ ۇسىنىسىم: 28 اقپاندا جەكسەنبى كۇنى ميتينگ ۇيىمداستىرۋ. مەن ءوزىم بارامىن. بۇكىل قازاقستان شىعايىق، – دەدى بەلسەندى.

ماكس بوقايەۆ ۇكىمەت اقىلعا كەلمەسە، ءسوزىن تىڭداماسا، 3 ناۋرىزدان باستاپ الاڭدارعا شاتىر تىگىپ وتىرۋ كەرەگىن ايتتى. 

بەلسەندى ماكس بوقايەۆ 2016 جىلعى جەر داۋىن كوتەرگەن ميتينگتەردەن كەيىن 5 جىلعا سوتتالعان.