پرەزيدەنت قاسىم-جومارت توقايەۆ پاۆلودار وبلىسىنىن وقۋشىسىنىڭ حاتىنا جاۋاپ بەرىپ، سىيلىق بەردى. بۇل تۋرالى وبلىس اكىمىنىڭ باسپا ءسوز قىزمەتى حابارلادى.
باسپا ءسوز قىزمەتىنىڭ مالىمەتىنشە، ەكى اپتا بۇرىن ەرتىس اۋدانىنان كەلگەن 10 جاسار مانسۇر بايمۇسا قاسىم-جومارت توقايەۆقا حات جازىپ، شاحمات پەن اعىلشىن تىلىنە دەگەن قىزىعۋشىلىعى تۋرالى ايتىپ بەرگەن.
⠀
مەملەكەت باسشىسىنىڭ جاۋابىن وعان پاۆلودار وبلىسىنىڭ اكىمى ءابىلقايىر سقاقوۆ تاپسىردى.
⠀
"اينالايىن مانسۇر! سەنىڭ حاتىڭدى ىقىلاسپەن وقىپ شىقتىم. ماعان جولداعان اق تىلەگىندى شىنايى ريزاشىلىقپەن قابىلدادىم. شاحماتپەن اينالىسىپ، اعىلشىن ءتىلىن دە مەڭگەرىپ ءجۇرسىن، جارايسىڭ. ەلىمىزدە ءوزىڭ سياقتى زەرەك ءارى ۇلگىلى بالالار بولسىن دەپ تىلەيمىن. كەلەشەكتە ءوز ءىسىنىڭ مامانى بولىپ، وتانىمىزعا ادال قىزمەت ەتەتىنىنە كامىل سەنەمىن. اتا-اناڭا مەنىڭ سالەمىمدى جەتكىز. ارمانىڭ ءار-دايىم اسقاق بولسىن، مانسۇر. قۇرمەتپەن، قاسىم-جومارت كەمەل ۇلى توقايەۆ" دەپ جازىلعان حاتتا.
⠀
پرەزيدەنت قاسىم-جومارت توقايەۆ سىيلاعان شاحمات مانسۇرعا تاپسىرىلدى.
پىكىر قالدىرۋ