الماتى قالاسىنداعى ءمايىتحانا ديرەكتورى باقىتجان الىبەكوۆ پارا الدى دەگەن كۇدىككە ءىلىندى، دەپ حابارلادى سىبايلاس جەمقورلىققا قارسى ءىس-قيمىل اگەنتتىگىنىڭ الماتى قالاسى بويىنشا دەپارتامەنتىنىڭ باسپا ءسوز قىزمەتى.
مەكەمەنىڭ مالىمەتىنشە، ول ءوزى قۇرعان Veritas Primus جاۋاپكەرشىلىگى شەكتەۋلى سەرىكتەستىگى ارقىلى بيۋدجەت قارجىسىن جىمقىردى دەگەن كۇدىككە ىلىنگەن.
"الماتى قالاسى بويىنشا سىبايلاس جەمقورلىققا قارسى قىزمەتى قالالىق پاتولوگواناتوميالىق بيۋرونىڭ ديرەكتورى الىبەكوۆكە قاتىستى تەرگەۋدى اياقتادى. ول 2020 جىلى مەملەكەتتىك ساتىپ الۋ كەلىسىمشارتى بويىنشا 4،5 ملن تەڭگە كولەمىندە اقشا ۇرلاعان. بۇل اقشانى جىمقىرۋ ءۇشىن ول Veritas Primus ج ش س قۇردى" دەلىنگەن حابارلامادا.
سونداي-اق ول قالالىق پاتولوگواناتوميالىق بيۋروسىنىڭ جاڭا سالىنىپ جاتقان عيماراتىنا مەديسينالىق جابدىقتاردى جەتكىزۋ بويىنشا قابىلداۋ اكتىسىنە قول قويعانى ءۇشىن الماتىلىق كاسىپكەردەن 14 ملن تەڭگە كولەمىندە پارا الدى دەگەن كۇدىككە ءىلىندى.
– قازىرگى ۋاقىتتا قىلمىستىق ءىس سوت قاراۋىندا جاتىر. كۇدىكتىنىڭ كىناسى تۋرالى شەشىمدى سوت شىعارادى، – دەپ اتاپ ءوتتى سىبايلاس جەمقورلىققا قارسى قىزمەت.
الماتى ءمايىتحاناسىنىڭ ديرەكتورى باقىتجان الىبەكوۆ وتكەن جىلدىڭ قازان ايىندا قاماۋعا الىنعان. سودان كەيىن ول تەك جابدىقتى قابىلداۋ اكتىلەرىنە قول قويۋ ءۇشىن پارا الدى دەپ كۇدىكتەلگەنى تۋرالى حابارلانعان.
پىكىر قالدىرۋ