ءبىلىم جانە عىلىم ءمينيسترى اسحات ايماعامبەتوۆ ۇكىمەت وتىرىسىندا سوڭعى 3 جىلدا 42 بالالار ءۇيى جابىلىپ، تاربيەلەنۋشىلەردىڭ سانى 1969-عا ازايعانىن مالىمدەدى.

– رەسپۋبليكادا بالالاردىڭ قۇقىعىن قورعاۋ جانە ولاردىڭ دامۋىنا قولايلى جاعداي جاساۋ بويىنشا جۇيەلى شارالار قابىلدانعان. وسى ماسەلە بويىنشا پرەزيدەنت تاپسىرمالارىنىڭ شەڭبەرىندە جاڭا زاڭنامالىق نورمالار قاراستىرىلۋدا. 2 جىل ىشىندە ۇلتتىق زاڭناماعا 83 جاڭا تۇزەتۋلەر ەنگىزىلدى. سونىڭ ىشىندە 2020 جىلدىڭ وزىندە بالالاردىڭ قۇقىعىن قورعاۋ ءۇشىن 22 نورماتيۆتىك-قۇقىقتىق اكت قابىلداندى، – دەدى مينيستر.

ونىڭ ايتۋىنشا، سوڭعى 10 جىلدا بالالار ۇيلەرىنىڭ سانى 210-نان 96-عا دەيىن نەمەسە 2 ەسە، ونداعى تاربيەلەنۋشىلەردىڭ سانى 3 ەسە ازايعان.

– سوڭعى 3 جىلدا 42 بالالار ءۇيى جابىلىپ، تاربيەلەنۋشىلەردىڭ سانى 1969-عا ازايىپ وتىر. بالالار ۇيلەرىندە ارنايى قامقورشىلىق كەڭەسى قۇرىلدى. 18 بالالار ءۇيى بالالاردى قولداۋ ورتالىقتارىنا بەيىمدەلدى. بالا اسىراپ الاتىن اتا-انالاردى مىندەتتى تۇردە دايارلىقتان وتكىزۋ ءۇشىن "بالا اسىراپ الشۋىلار مەكتەبى" ينستيتۋتى ەنگىزىلدى. ەرەكشە ءبىلىم بەرۋدى قاجەت ەتەتىن بالالار ءۇشىن ءبىلىم بەرۋ تەتىكتەرىن دامىتۋ ماڭىزدى. بالالاردىڭ ساپالى ءبىلىم الۋىن قامتاماسىز ەتۋ ءۇشىن ارنايى پەداگوگتەردى دايىنداۋ بويىنشا سوڭعى جىلى گرانت سانىن 2 ەسەگە كوبەيتتىك، – دەپ اتاپ ءوتتى ايماعامبەتوۆ.