شىعىستانۋشى، ءدىنتانۋشى، ادەبيەت زەرتتەۋشى، جازۋشى، سىنشى، فيلولوگيا عىلىمدارىنىڭ دوكتورى ءابساتتار قاجى دەربىسالى قايتىس بولدى.

بىرەر كۇن بۇرىن ونىڭ قاتتى سىرقاتتانىپ، جانساقتاۋ بولىمىندە جاتقانى حابارلانعان.

ءابساتتار باعىسباي ۇلى دەربىسالى 1947 جىلى 15 قىركۇيەكتە وڭتۇستىك قازاقستان وبلىسى تۇلكىباس اۋدانىندا دۇنيەگە كەلگەن.

1969 جىلى م.اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتىنىڭ فيلولوگيا فاكۋلتەتىن ۇزدىك ءتامامداعان.

1970-1975 جىلدارى كسرو عىلىم اكادەمياسى شىعىستانۋ ينستيتۋتىنىڭ اسپيرانتۋراسىندا وقىدى.

1975-1976 جىلدارى ماروككو كورولدىگى، 1985-1986 جىلدارى تۋنيس اراب رەسپۋبليكاسى ۋنيۆەرسيتەتتەرىندە اراب ءتىلى مەن ادەبيەتى بويىنشا بىلىكتىلىك ارتتىرۋدان وتكەن.

1976-1977 جىلدارى ق ر عىلىم اكادەمياسى م.و.اۋەزوۆ اتىنداعى ادەبيەت جانە ونەر ينستيتۋتىنىڭ عىلىمي قىزمەتكەرى بولعان.

1977 جىلى ءال-فارابي اتىنداعى قازاق مەملەكەتتىك ۇلتتىق ۋنيۆەرسيتەتىندە اسسيستەنت، اعا وقىتۋشى، دوسەنت، فيلولوگيا فاكۋلتەتى دەكانىنىڭ ورىنباسارى، شىعىس فيلولوگيا كافەدراسىنىڭ مەڭگەرۋشىسى، 1986-1988 جىلدارى كسرو عىلىم اكادەمياسى شىعىستانۋ ينستيتۋتىنىڭ دوكتورانتى، 1989 جىلى شىعىستانۋ فاكۋلتەتىنىڭ دەكانى، 1991-1997 جىلدارى تىلدەر جانە حالىقارالىق بايلانىستار جونىندەگى پرورەكتور، 1997-2000 جىلدارى قازاقستان رەسپۋبليكاسىنىڭ ساۋد ارابياسى كورولدىگىندەگى ەلشىلىگىنىڭ كەڭەسشىسى، 1-سىنىپتى كەڭەسشى قىزمەتتەرىن اتقارعان.