ءبىلىم جانە عىلىم ءمينيسترى اسحات ايماعامبەتوۆ بيىلعى وقۋ جىلىندا ەنگىزىلەتىن وزگەرىستەردى ايتتى.
– كەلەسى وقۋ جىلىنان باستاپ "التىن بەلگىگە" تالاپتار كۇشەيتىلەدى. ءبىز مۇنى جىل سايىن كەزەڭ-كەزەڭمەن وزگەرتىپ جاتىرمىز. وتكەن جىلى ءبىراز وزگەرىستەر ەنگىزدىك. بيىل ەكىنشى كەزەڭ. ەكىنشى كەزەڭ دەگەنىمىز – جىلدىق بەس باعامەن قاتار ۇمىتكەرلەردىڭ 11-سىنىپتاعى بارلىق توقساندىق باعالارى دا بەس بولۋى كەرەك دەگەن قاعيدا ەنگىزىلەدى. بۇل – وتە ماڭىزدى قاعيدا. تۇلەكتەر ءۇشىن ەمتيحاندى تاۋەلسىز ۇيىم وتكىزەتىن بولادى. بۇل رەفورما وڭ ناتيجەسىن بەرەدى دەپ سەنەمىن، – دەدى ول.
ايماعامبەتوۆ پەداگوگتەرگە ارنالعان رەسپۋبليكالىق تامىز كونفەرەنسياسىندا بالالاردىڭ قاۋىپسىزدىگى ماڭىزدى ەكەنىن، بارلىق وڭىرلەردە مەكتەپتەر بەينەباقىلاۋ جۇيەسىمەن قامتىلعانىن اتاپ ءوتتى.
– مەكتەپتەردىڭ ءبارى 100 پايىز بەينەباقىلاۋ جۇيەسىمەن قامتىلعان. ءبىراق ولاردىڭ 55 پايىزى ستاندارت تالاپتارىنا ساي كەلەدى. مەكتەپتەردىڭ 98،8 پايىزى جىلى اجەتحانالارمەن قامتاماسىز ەتىلگەن. وسى جىلدىڭ سوڭىنا دەيىن ءوزىمىز كەلىسكەندەي بارلىق وڭىرلەر وسى كورسەتكىشتى 100 پايىزعا دەيىن جەتكىزۋى ءتيىس. بۇل بويىنشا ۇلكەن جۇمىس جاسالدى. جالپى ءبىر-بىر جارىم جىل ىشىندە 2،5 مىڭ جىلى دارەتحانا جاسالادى، – دەدى مينيستر.
