شىمكەنت قالاسىنداعى №2 اۋرۋحانا بازاسىنداعى ينسۋلت ورتالىعى پرەزيدەنت جولداۋى اياسىنداعى تاپسىرمالاردى نەگىزگە الا وتىرىپ، حالىققا تاۋلىك بويى مەديسينالىق قىزمەت كورسەتۋگە كوشتى.

ەندى تاۋلىكتىڭ كەز كەلگەن ۋاقىتىندا ينسۋلت العان ناۋقاستارعا دارىگەرلەر شۇعىل مەديسينالىق كومەك كورسەتىپ، وتا جاساي الادى. وسىلايشا مەديسينا ماماندارى ءولىم-جىتىم كورسەتكىشىنىڭ الدىن الىپ، ءينسۋلتتىڭ سالدارىنان پايدا بولاتىن مۇگەدىكتىك سانىن ازايتپاق.

اۋرۋحانانىڭ باس دارىگەرى اسقار راحمەتالييەۆتىڭ باستاماسىمەن ناۋقاستار تۇنگى ۋاقىتتا دا ەم قابىلداۋى ءۇشىن وسىنداي قولايلى جاعداي جاسالىپ وتىر. قالالىق №2 اۋرۋحانا بازاسىنان كوۆيد ورتالىعى اشىلىپ، ءۇش اي بويى ەمدەۋ ورتالىعىنىڭ ماماندارى ءقاۋىپتى ىندەتكە شالدىققان ناۋقاستارعا ەمدەۋ جۇمىستارىن جۇرگىزدى. مۇندا ينفەكسيالىق ستاسيونار جۇمىسىن توقتاتىپ، 17 قىركۇيەكتەن بەرى اۋرۋحانا قالىپتى رەجيمدە جۇمىس ىستەۋدە. ال اۋرۋحانا بازاسىنداعى ينسۋلت ورتالىعى بىردەن تاۋلىك بويى جۇمىس ىستەۋگە كوشتى.

ايتا كەتەيىك، قالالىق №2 اۋرۋحانادا سوڭعى ۇلگىدەگى ەكسپرەرت كلاستى بيپلاندى Philips Azurion 7 ۆ20/15 انگيوگرافيالىق اپپاراتى مەن وكپەنى جاساندى تىنىستاندىرۋ، سيفرلى رەنگەن سىندى ينسۋلت اۋرۋىن ەمدەۋگە قاجەت اپپاراتتار ورناتىلعان. زاماناۋي قۇرىلعىلارمەن ليتۆا، گەرمانيا، فرانسيا، ۇلىبريتانيا، وڭتۇستىك كورەيا، تۇركيا، رەسەي فەدەراسياسىندا بىلىكتىلىگىن ارتتىرىپ كەلگەن ماماندار جۇمىس ىستەيدى.

24 ساعاتتىق رەجيمدەگى ينسۋلت ورتالىعىندا بىلىكتى ماماندار 20 ناۋقاسقا كۇردەلى وتا جاساپ ۇلگەردى. ونىڭ ىشىندە 18 ناۋقاسقا ينسۋلت، 2 ناۋقاسقا جۇرەك-قان تامىرلارى بويىنشا تىلىكسىز وپەراسيا جاسالدى. حيرۋرگيالىق ەم جاسالعان ناۋقاستاردىڭ بارلىعىنىڭ دا ەم قابىلداۋ بارىسىندا جاعدايى جاقسارىپ، پالاتاعا اۋىستىرىلعان.