1 سىنىپ وقۋشىلارىنا ارنالعان "مەنىڭ التىن جازۋ ۇلگىم" جۇمىس داپتەرىندە بالالارعا جازۋعا ۇسىنىلعان سوزدەر تىزبەسىندە "ءول" دەگەن ءسوز بەرىلگەن. بۇل الەۋمەتتىك جەلىدە قىزۋ تالقىعا ءتۇسىپ، جەلى قولدانۋشىلارى وقۋ قۇرالى ساتىلىمنان الىنۋىن تالاپ ەتۋدە، دەپ حابارلادى 31 ارنا تەلەارناسى.
ءبىلىم جانە عىلىم مينيسترلىگى وكىلىنىڭ ايتۋىنشا، بۇل داپتەر مينيسترلىك تاراپىنان بەكىتىلگەن وقۋ قۇرالدارىنىڭ تىزىمىندە جوق. ال مۇنداي داپتەردى قوسىمشا وقۋ قۇرالى رەتىندە پايدالانۋ نە پايدالانباۋدى مەكتەپ باسشىلىعىنىڭ ءوزى شەشەدى.
– اتالعان جازۋ داپتەرى سەكىلدى قوسىمشا وقۋ باسىلىمدارىن، وقۋلىقتاردى، داپتەرلەردى جانە باسقا قوسىمشا ماتەريالداردى تاڭداۋ قۇقىعى ءبىلىم بەرۋ ۇيىمدارىنا بەرىلگەن، – دەدى ءبىلىم جانە عىلىم مينيسترلىگىنىڭ باسپا ءسوز حاتشىسى ءمولدىر ابدۋالييەۆا.
ايتا كەتەيىك، مۇنداي باسىلىمدار اشىق ساتىلىمدا نەمەسە ينتەرنەتتە قولجەتىمدى. قوسىمشا وقۋلىقتار ەرتەگىلەر جيناقتارى، داپتەرلەر سياقتى ولار ارنايى بەكىتىلمەيدى.
