شىمكەنت قالاسىندا حالىقپەن كەرى بايلانىس ورناتۋ، اكىمشىلىك كەدەرگىلەردى ازايتۋ جانە ارىز-شاعىمدار مەن تالاپ-تىلەكتەردى ءبىر ورىننان قابىلداۋ باعىتىندا «اشىق اكىمدىك» ناتيجەلى جۇمىس ىستەپ كەلەدى.

اكىمدىكتىڭ 1-قاباتىندا ورنالاسقان ارنايى كەڭسەدە قالا اكىمى مەن ورىنباسارلارى، اۋدان اكىمدەرى جانە سالالىق باسقارما باسشىلارى تۇرعىنداردى جەكە ماسەلەلەرى بويىنشا تۇراقتى قابىلدايدى. الايدا، ەل اۋماعىندا قالىپتاسقان ەپيداحۋالعا بايلانىستى قابىلداۋلار ۋاقىتشا ونلاين وتۋدە.

بۇگىندە جەرگىلىكتى بيلىكتىڭ قىزمەتىنە قاتىستى ارىز نەمەسە ۇسىنىس ايتا كەلگەن ازاماتتاردى العاش قابىلداپ، تۇرعىندارمەن تياناقتى تىلدەسەتىن «اشىق اكىمدىكتىڭ» قىزمەتكەرلەرى. جاۋاپتىلاردىڭ بايانداۋىنشا، ازاماتتاردىڭ باسىم بولىگى – جەر مەن تۇرعىن ءۇي الۋ ماسەلەسى بويىنشا جۇگىنەدى.

وتىنىشتەرمەن جۇمىس جاساۋ ءبولىمىنىڭ باسشىسى بەگايىم باقتىبايەۆانىڭ ايتۋىنشا، مەملەكەتتىك كورسەتىلەتىن قىزمەتتەردى اۆتوماتتاندىرۋ تۋرالى مەملەكەت باسشىسىنىڭ تاپسىرماسىنا سايكەس، بۇگىندە قالا اكىمدىگى ارقىلى ۇسىنىلاتىن مەملەكەتتىك قىزمەتتەر 95 پايىزعا سيفرلاندىرىلعان. اكىمدىك قۇزىرەتى شەگىندە 167 مەملەكەتتىك قىزمەت كورسەتەتىن بولسا، سونىڭ 158ء-ى «Egov.kz» پورتالى ارقىلى جۇزەگە اسادى، قالعان 9-ى ازىرگە قاعاز جۇزىندە. ءبىراق جىل سوڭىنا دەيىن ارنايى پورتالدار ىسكە قوسىلىپ، اكىمدىك ۇسىناتىن قىزمەتتەر تولىق ەلەكتروندى تۇردە ۇسىنىلادى.

قىركۇيەك ايىنان باستاپ، تۇرعىندار وزدەرىن تولعاندىراتىن پروبلەمالار بويىنشا اكىمدىككە كەلىپ اۋرە بولماي، ارىز-شاعىمدارى مەن تالاپ-تىلەكتەرىن ۇيدە وتىرىپ، «ە-وتىنىش» اقپاراتتىق جۇيەسىنىڭ كومەگىمەن جولداي الادى.
قازىرگى تاڭدا ازاماتتار كوتەرگەن ماسەلەلەردى نازارعا الىپ، جۇمىس ىستەۋ جۇيەلەنىپ كەلەدى. ماسەلەن، 2021 جىلعى ءىى توقساندا شىمكەنت قالاسىنىڭ اكىمدىگىمەن جەكە تۇلعالارعا – 4 197 455، زاڭدى تۇلعالارعا – 4 337 قىزمەت ۇسىنىلدى. اتالعان قىزمەتتەردىڭ 99 پايىزى ەلەكتروندى تۇردە كورسەتىلدى.

سونداي-اق، قالا اكىمىنىڭ باستاماسىمەن بىلتىر اشىلعان «IKomek-109 ورتالىعى» تۇرعىندارمەن تىكەلەي بايلانىس ورناتۋدا ءوز تيىمدىلىگىن كورسەتىپ وتىر. بۇل ورتالىققا بيىلعى 8 ايدا 133 مىڭنان استام ءوتىنىش ءتۇسىپ، ونىڭ 98 پايىزى قاناعاتتاندىرىلعان.
«حالىق ۇنىنە قۇلاق اساتىن مەملەكەت» تۇجىرىمداماسى اياسىندا قولعا الىنعان تىندىرىمدى تىرلىكتەردىڭ ارقاسىندا قالاداعى مەملەكەتتىك ورگاندارعا تىكەلەي جولداناتىن وتىنىشتەر سانى ەكى ەسە ازايعان. ماسەلەن، بيىلعى 8 ايدا جەرگىلىكتى اتقارۋشى ورگاندارعا – 21 538 ءوتىنىش تۇسسە، وتكەن جىلعى ەسەپتى كەزەڭدە بۇل كورسەتكىش – 47 543ء-تى قۇراعان بولاتىن.

ايتا كەتەيىك، شىمكەنتتە جىل باسىنان بەرى جەرگىلىكتى ورگانداردىڭ قىزمەتىنە قاتىستى قابىلدانعان وتىنىشتەردىڭ 93%-ىنا جاۋاپ بەرىلگەن.