پرەزيدەنت جولداۋدا «جەمشوپ دايىنداۋعا قاجەتتى جەر كولەمىن كەڭەيتۋ جانە ەگىس القابىنا ءار جىلى ءارتۇرلى داقىل ەگۋدى باقىلاۋعا العان ءجون» ەكەنىن ايتتى. بۇل تاپسىرمانىڭ اياسىندا شىمكەنت قالاسىندا قانداي جۇمىستار قولعا الىندى؟

شىمكەنت - رەسپۋبليكالىق قالا مارتەبەسىن الۋىنا بايلانىستى، اۋىل شارۋاشىلىعى جەرلەرى جىل سايىن ازايۋدا. سوندىقتان اۋىل شارۋاشىلىعى جانە ۆەتەريناريا باسقارماسى مال ازىقتىق داقىلدار كولەمىن ارتتىرۋدا وزىق تەحنولوگيانى قولدانباق.

مامانداردىڭ ايتۋىنشا، كەلەر جىلدان باستاپ وزىق تەحنولوگيانىڭ كومەگىمەن گيدروپونيكا ءادىسى شارۋاشىلىقتارعا ەندىرىلەدى. تارقاتىپ ايتقاندا، جابىق كەڭىستىكتە 2 كەلى استىق ءدانىن سەۋىپ، 7 كۇندە 12 كەلىگە دەيىن مال ازىقتىق داقىلىن الۋعا بولادى. بۇل ءادىس ارقىلى الىنعان مال ازىقتىق داقىلدارىنىڭ قۇنارلىلىعى ارتىپ، ونىمدىلىك تە ارتا تۇسپەك.

سونىمەن بىرگە ءارتاراپتاندىرۋ باعدارلاماسىن ىسكە اسىرۋ ناتيجەسىندە جىل سايىن ەگىس القاپتارىن 0،7-دەن 1،0 مىڭ گەكتارعا دەيىن ارتتىرۋ جوسپارى قويىلعان. 2018-2020 جىلدار كەزەڭىندە اۋىل شارۋاشىلىعى داقىلدارىنىڭ ەگىستىك القاپتارى 3،6 مىڭ گەكتارعا ارتىپ، 29،3 مىڭ گەكتاردى قۇراعان بولاتىن. سونىڭ ىشىندە مال ازىقتىق داقىلدار 700 گەكتارعا ارتقان.

مال ازىقتىق داقىلدارىن ۇلعايتۋ بويىنشا ارنايى ءىس-شارا جوسپارى بەكىتىلىپ، سونىڭ نەگىزىندە ءتيىستى جۇمىستار جۇرگىزىلىپ كەلەدى. ماسەلەن، قالا بويىنشا مال ازىعىنا قاجەتتى جەم-شوپ 358،5 مىڭ توننانى قۇراسا، جىل سايىن ونىڭ 186،4 مىڭ تونناسى شىمكەنتتە دايىندالادى. ياعني ءقازىر جەرگىلىكتى شارۋالار ارقىلى قاجەتتىلىكتىڭ 52 پايىزى قامتاماسىز ەتىلۋدە.

اۋىل شارۋاشىلىعى ءونىمىن وندىرۋشىلەر ءىرى قارا، قوي، جىلقىنىڭ انالىق باسىنا ساتىپ الاتىن جەمشوپ قۇنىن ارزانداتۋ ماقساتىندا قاراستىرىلعان 148 ملن. تەڭگە بيىل جىل سوڭىنا دەيىن جەرگىلىكتى بيۋدجەت ەسەبىنەن قوسىمشا 100 ملن. تەڭگەگە تولىعاتىن بولادى.