شىمكەنت قالاسىندا جاس رەجيسسەرلەرگە ارنالعان SHYMKENT NOMAD FILM FEST قىسقامەتراجدى فيلمدەر فەستيۆلى ءوز مارەسىنە جەتتى. «جاستار رەسۋرستىق ورتالىنىڭ» ۇيىمداستىرۋىمەن وتكەن سالتاناتتى جيىن ەل تاۋەلسىزدىگىنىڭ 30 جىلدىعىنا ارنالادى.

ماراپاتتاۋ راسىمىنە قاتىسقان شىمكەنت قالاسى اكىمىنىڭ ءبىرىنشى ورىنباسارى شىڭعىس مۇقان جاس تالانتتاردى قۇتتىقتاپ، شىعارماشىلىق تابىس تىلەدى.

– بايقاۋدىڭ ماقساتى – قالامىزداعى كينويندۋستريا سالاسىنا ۇلكەن ءمان بەرىپ، جاس تالانتتارعا قولداۋ جاساۋ. سونىمەن قاتار فەستيۆالگە قاتىسۋشى دارىندى جاستاردىڭ شىعارماشىلىعىنا قولداۋ كورسەتۋ ارقىلى مۇمكىندىك بەرەتىن ۇلكەن شىعارماشىلىق الاڭ قۇرۋ. جۇلدەلى ورىن العان 4 ءفيلمدى كورەرمەندەرمەن بىرگە تاماشالادىق. جاس رەجيسسەرلەردىڭ اياق الىسى جامان ەمەس. بيىل بۇل بايقاۋ شىمكەنتتە بەسىنشى رەت ۇيىمداستىرىلىپ وتىر. جاستارىمىز وسىنداي قارقىندا ەڭبەكتەنىپ، ىزدەنە تۇسسە قالامىزدان ءالى تالاي مىقتى كينورەجيسسەرلەر شىعاتىنى ءسوزسىز. وسىنداي شاعىن كينوفەستيۆالدەر ولاردىڭ تانىلىپ، شىڭدالا تۇسۋىنە جول اشادى دەپ سەنەمىز، - دەدى قالا اكىمىنىڭ ءبىرىنشى ورىنباسارى.

وسى جىلدىڭ 12 تامىز -10 قىركۇيەك ارالىعىندا وتكەن بايقاۋعا قاتىسۋعا 30 ۇمىتكەر نيەت ءبىلدىرىپ، قازىلار القاسى سونىڭ ىشىنەن 10 كينوتۋىندىنى ىرىكتەپ العان. تانىمال رەجيسسەر، «TALAS» film كينوستۋدياسىنىڭ باسشىسى سەرىك تالاسوۆ، «سايرام-وركەنيەت» بپۇ ءتوراعاسى جادىرا تاڭاتاروۆا، شىمكەنت قالاسى ءماسليحاتىنىڭ دەپۋتاتى تالعات بالتابايەۆ، اكتەر مارات دوستايەۆ، پروديۋسەر باقبەرگەن اسانبايەۆ ساراپشىلار اراسىنان تابىلدى.

قازىلار القاسى مۇشەلەرىنىڭ ايتۋىنشا، بايقاۋ قاتىسۋشىلارى جاستىعىنا قاراماستان قوعامداعى كوكەيتەستى ماسەلەلەردى فيلمدەرىنە ارقاۋ ەتە العان. ولار جاس رەجيسسەرلەردىڭ ەڭبەگىندە ءاربىر بەينەسيۋجەتتىڭ تاقىرىپتىق يدەياسىنىڭ ەرەكشەلىگىنە جانە ەڭبەكتىڭ جانرلىق تالاپتارعا ساي بولۋىنا ايرىقشا ءمان بەرگەندەرىن ايتادى.

بايقاۋ قورىتىندىسى بويىنشا ءۇشىنشى ورىندى ەرسۇلتان تىلەۋوۆتىڭ «تاڭداۋ» تۋىندىسى قورىتىندىلادى. ەكىنشى ورىن دميتريي ءۆلاديميروۆيچتىڭ ەنشىسىندە («ۋسپەح. جەتىستىك» ءفيلمى). ال ءبىرىنشى ورىن «ساداقا» ءفيلمىنىڭ رەجيسسەرى بولات قوجاحمەتكە بۇيىردى. باس جۇلدەگە «اكە» ءفيلمىنىڭ رەجيسسەرى ەرداۋلەت اليبەكوۆ يە بولدى.

ايتا كەتسەك، بۇل فەستيۆال بۇعان دەيىن «سامعاۋ» دەگەن اتاۋمەن شىمكەنتتە 5 جىل قاتارىنان وتكىزىلگەن بولاتىن. ءبىراق ەلدەگى ەپيداحاۋالدىڭ كۇردەلەنۋىنە بايلانىستى ۋاقىتشا توقتاعانىمەن بيىل «Shymkent nomad film fest» قىسقامەتراجدى فيلمدەر فەستيۆالى اتاۋىمەن قايتا باستاۋ الدى.