شىمكەنت قالاسىنىڭ ونكولوگتارى گروزنىي قالاسىندا وتكەن ونكولوگيا سالاسىنداعى دۇنيەجۇزىلىك كوشباسشىلاردىڭ فورۋمىندا ءوز تاجىريبەلەرىمەن ءبولىستى.
حالىقارالىق جيىن – مەديسيناداعى از ءينۆازيۆتى تاسىلدەردى قولدانا وتىرىپ، ونى ەمدەۋ ادىستەرىنە كەڭىنەن ەنگىزۋ ءۇشىن ۇيىمداستىرىلعان. دۇنيەجۇزىلىك فورۋمعا قاتىسقان شىمكەنتتىك ونكلوگتار ەمدەۋ ادىستەرى جونىندە شەت ەلدىك ارىپتەستەرىمەن تاجىريبە الماستى.
قالاداعى ونكولوگيالىق ورتالىقتىڭ حيميوتەراپيا جانە ەندوۆاسكۋليارلىق ونكولوگيا ءبولىمىنىڭ مەڭگەرۋشىسى مەديسينا عىلىمدارىنىڭ كانديداتى داۋرانبەك ارىبجانوۆ فورۋمدا مي ىسىكتەرى كەزىندەگى ەندوۆاسكۋليارلىق ارالاسۋ باعىتىندا باعدارلامالىق بايانداما جاسادى.
سونداي-اق جيىنعا قاتىسقان جەرگىلىكتى مەديسينا ماماندارى ەندوۆاسكۋليارلىق وپەراسيالار جونىندەگى تاجىريبەسىمەن ءبولىستى.
حالىقارالىق فورۋم اياسىندا جاس مەديسينا عالىمداردىڭ بايقاۋى ۇيىمداستىرىلىپ، سايىس ناتيجەسى بويىنشا قازاقستاندىق جاس ونكولوگتار ماديار ومىربايەۆ پەن ساردار المەتوۆتىڭ باياندامالارى ۇزدىك دەپ تانىلدى.
ايتا كەتسەك، ەكى كۇندىك فورۋمدا ەمبوليزاسيا ادىستەرى بويىنشا ءتۇرلى تاقىرىپتا شەبەرلىك ساباقتارى دا ءوتتى.
پىكىر قالدىرۋ