قازاقستاندا 30-دان استام بەلسەندى، قۇقىققورعاۋشى مەن مەدياتۇلعالاردىڭ باستاماسىمەن "الەۋمەتتىك جەلىنى بۇعاتتاۋعا قارسى" ونلاين پەتيسيا ىسكە قوسىلدى. قول جيناۋ اكسياسى پرەزيدەنت اكىمشىلىگى مەن پارلامەنتكە باعىتتالعان. قازىرگى تاڭدا وعان 6 مىڭعا جۋىق قول جينالعان.
پەتيسيا ماتىنىندە قىركۇيەكتە قازاقستان پارلامەنتىنىڭ ءماجىلىسى "بالا قۇقىقتارىن قورعاۋ ماسەلەلەرى بويىنشا كەيبىر زاڭنامالىق اكتىلەرگە وزگەرىستەر مەن تولىقتىرۋلار ەنگىزۋ تۋرالى" زاڭ جوباسىن ءبىرىنشى وقىلىمدا قابىلداعانى، وندا ەل اۋماعىندا شەتەلدىك ينتەرنەت-پلاتفورمالاردىڭ، الەۋمەتتىك جەلىلەردىڭ، مەسسەنجەرلەردىڭ جۇمىسىن شەكتەۋگە مۇمكىندىك بەرەتىن ءبىرقاتار نورما قامتىلعانى ايتالىدى.
پەتيسيا اۆتورىنىڭ سوزىنشە، شەكتەۋ – قازاقستاندىق ينتەرنەت-كەڭىستىكتە Facebook، Instagram، Telegram، Whatsapp جانە ت. ب. تانىمال الەۋمەتتىك جەلىلەردىڭ ەركىن پايدالانىلۋىنا ءقاۋىپ توندىرەدى.
سونداي-اق ماتىندە الەۋمەتتىك جەلىلەر مەن مەسسەنجەرلەردىڭ جۇمىسىن بۇعاتتاۋ جانە شەكتەۋ سوڭعى جىلدارى بىرنەشە رەت بولعانىن، اسىرەسە 2019 جىلدىڭ كوكتەمىنە دەيىن ءار ءتۇن سايىن قايتالانعانى ءوتاپ وتىلگەن.
Google، Mozilla سياقتى ءىرى ينتەرنەت-پلاتفورمالار نە Facebook سياقتى الەۋمەتتىك جەلى، ونىڭ Whatsapp مەسسەنجەرى جانە Instagram الەۋمەتتىك جەلىسى، سونداي-اق Telegram سياقتى مەسسەنجەرلەر ۇسىنىلاتىن تالاپتارعا كەلىسپەي، قازاقستاندا وكىلدىگىن تىركەۋدەن باس تارتىپ، سول ارقىلى قازاقستاندىقتاردى ەركىن ينتەرنەتتەن ايىرۋى بەك مۇمكىن.
تۇزەتۋدى ازىرلەۋشىلەر مەن ۋاكىلەتتى ورگان نورمالار كيبەربۋلليڭمەن كۇرەسۋ جانە شەتەلدىك پلاتفورمالارمەن تەز بايلانىس ورناتۋ ءۇشىن قاجەت ەكەنىن ايتادى. ءبىز مۇنىڭ ءتيىمسىز ەكەنىنە، ال بالانىڭ قۇقىعىن قورعاۋ سىلتاۋىمەن تۇزەتۋلەر جۇرگىزۋ تاكتيكاسى مانيپۋلياسيا ەكەنىنە سەنىمدىمىز." دەلىنگەن پەتيسيا ماتىنىندە.
سونداي-اق ۇندەۋدە شەكتەۋ نورمالارىن قابىلداۋ 2019 جىلعى پرەزيدەنت سايلاۋىنان كەيىن كوپ ايتىلاتىن ەلدى رەفورمالاۋ لوگيكاسىنا قايشى كەلەتىنى، تۇزەتۋلەردىڭ قابىلدانۋى ەلدىڭ بەدەلىنە حالىقارالىق نۇقسان كەلتىرىپ، قازاقستاندى قوعامدىق-ساياسي دامۋدا كەرى يتەرمەلەيتىنى انىق ەكەنى ايتىلعان.
"بۇل سونداي-اق قازاقستان رەسپۋبليكاسىنىڭ ادام قۇقىقتارى سالاسىنداعى مىندەتتەمەلەرىنە قايشى كەلەدى: ولاردىڭ ءبىر بولىگى سيفرلىق قۇقىقتار، اتاپ ايتقاندا، بالالاردىڭ اقپارات الۋ جانە تاراتۋ قۇقىعىن قوسا العاندا، اقپاراتقا قول جەتكىزۋ جانە تاراتۋ قۇقىعى؛ جەكە ومىرگە قول سۇقپاۋشىلىق قۇقىعى؛ ينتەرنەت جەلىسىندە بىرلەسۋ قۇقىعى؛ جانە باسقا دا ادام قۇقىقتارى. ادام قۇقىقتارىنا مەملەكەت ەنگىزگەن كەز-كەلگەن شەكتەۋ، ءتىپتى كيبەربۋلليڭگە قارسى كۇرەس سياقتى اقىلعا قونىمدى بولسا دا، ادامدى باسقا قۇقىقتارىنان ايىرماۋى كەرەك.
قازاقستان اۋماعىنداعى شەتەلدىك ونلاين-پلاتفورمالاردىڭ، سونىڭ ىشىندە الەۋمەتتىك جەلىلەر مەن مەسسەنجەرلەردىڭ قىزمەتىنە قاتىستى تۇزەتۋلەردى تولىق الىپ تاستاۋ، ال مەملەكەتكە قوعام جانە ساراپشىلارمەن بىرلەسىپ كيبەربۋلليڭمەن كۇرەسۋدىڭ ءتيىمدى تەتىكتەرىن ازىرلەۋ قاجەت دەپ سانايمىز. ماڭىزدىسى – ونىڭ الدىن الۋ، سونداي-اق بۇعان دەيىن بولعان قۇقىق بۇزۋشىلىقتاردى زەرتتەۋ.
ينتەرنەتتى دامىتۋ مەن رەتتەۋگە قاتىستى وسىنداي باستامالاردىڭ بارلىعى ەلدىڭ IT-قوعامداستىعىمەن، قۇقىق قورعاۋ جانە ازاماتتىق قوعاممەن، مۇددەلى توپتارمەن، بۇل جاعدايدا بالالار مەن جاسوسپىرىمدەردىڭ وزدەرىنىڭ مۇددەسىن ەسكەرە وتىرىپ، سونداي-اق بالالاردىڭ دامىپ كەلە جاتقان قابىلەتتەرى قاعيداتىن ەسكەرىپ، سەنزۋرانى بولدىرماۋ جانە ادامنىڭ سيفرلىق قۇقىقتارىن شەكتەمەۋ ءۇشىن مىندەتتى تۇردە تالقىلانۋعا ءتيىس" دەيدى بەلسەندىلەر.
پەتيسياعا جينالعان قول 15 قازاندا پرەزيدەنت اكىمشىلىگى مەن قازاقستان پارلامەنتىنە تاپسىرىلماق.
پەتيسياعا قول قويۋ ءۇشىن مىنا سىلتەمەگە ءوتۋ كەرەك.
پىكىر قالدىرۋ