قازاقستان رەسپۋبليكاسىنىڭ ۇلتتىق مۇراعاتىندا قازاق مەملەكەتتىك جانە قوعام قايراتكەرى، ويشىل، عالىم، تۇركىستان حالىقتارىنىڭ كوسەمى مۇستافا شوقايدىڭ 125 جىلدىعىنا وراي «مۇستافا شوقاي: الاش ارىسى» اتتى قۇجاتتىق كورمەسى اشىلدى. بۇل تۋرالى قامشى پورتالى قازاقپاراتقا سىلتەمە جاساي وتىرىپ حابارلايدى.

«كورمەدە العاش رەت مۇستافا شوقايدىڭ ءومىرى مەن قىزمەتىنە قاتىستى ارمەنيا، ۆەنگريا، مىسىر، يران، جۇڭگو، پولشا، رەسەي، اقش، تۇركيا، وزبەكستان، فرانسيا مۇراعاتتارى، كىتاپحانالارى مەن عىلىمي ورتالىقتارىنان الىنىپ، قازاقستان رەسپۋبليكاسى ۇلتتىق مۇراعاتىنىڭ №83 قورىندا ساقتالاتىن جانە كورنەكتى قوعام قايراتكەرلەرىنىڭ جەكە قورلارىنان الىنعان مۇراعاتتىق قۇجاتتاردىڭ ءتۇپنۇسقالارى مەن كوشىرمەلەرى قويىلادى»، - دەيدى ۇلتتىق مۇراعاتتىڭ وكىلدەرى.

مۇراعاتتىڭ باسپا ءسوز قىزمەتى اتاپ وتكەندەي، مۇستافا باستاۋىش ءبىلىمدى اۋىلدا اتا-اناسىنان الىپ، تاشكەنتتەگى ورىس گيمنازياسىن جانە پەتەربور ۋنيۆەرسيتەتىنىڭ زاڭ فاكۋلتەتىن ۇزدىك بىتىرگەن. مۇستافا شوقاي مەملەكەتتىك دۋمانىڭ مۇسىلمان فراكسياسى ساياسي بيۋروسىندا تۇركىستان حالىقتارىنىڭ بىردەن-بىر وكىلى بولعان. گۋمانيست-ويشىل، دەموكرات، ەنسيكلوپەديالىق ءبىلىم يەسى، اعارتۋشى مۇستافا شوقاي ورتا ازيا مەن قازاقستان حالىقتارى تاريحى مەن مادەنيەتىنىڭ جوقتاۋشىسى بولدى، اعىلشىن، فرانسۋز، نەمىس، تۇرىك جانە اراب تىلدەرىن وتە جەتىك مەڭگەرگەن. بۇكىل عۇمىرىن ول ورتا ازيا مەن قازاقستان حالىقتارىنىڭ ار-ابىرويىن قورعاۋعا، شىندىق ءۇشىن كۇرەسكە ارنادى. ۇلى وتان سوعىسى باستالىسىمەن ناسيستەر پاريجدە بارلىق الدىڭعى قاتارلى ورىس ەميگرانتتارىن تۇتقىنداپ، كومپەن كونسلاگەرىنە جىبەردى. ولاردىڭ ىشىندە شوقاي دا بولدى. ءۇش اپتادان كەيىن ونى بەرلينگە اكەلىپ، قۇرامىنا تۇتقىندالعان كەڭەس تۇرىكتەرى الىناتىن تۇركىستان لەگيونىن باسقارۋعا ۇگىتتەگەن. مۇستافا شوقاي 1941 جىلدىڭ 27 جەلتوقسانىندا وسى لاگەرلەردىڭ بىرىندە دۇنيەدەن ءوتتى.