بۇگىن استانادا ۇلت كوشباسشىسى كىتاپحاناسىندا ەڭبەك جانە مۇعالىمدەر كۇنى قارساڭىندا ەڭبەك اۋلەتتەرىنە ارناپ كونسەرت وتكىزىلدى. بۇل تۋرالى قامشى پورتالى قازاقپاراتقا سىلتەمە جاساي وتىرىپ حابارلايدى.

جاستارمەن كەزدەسۋگە ەلگە ەلەۋلى وتباسىلار شاقىرىلعان. مىسالى، ماقانوۆتار جانۇياسىندا 11 ادام ۇستازدىقتى ءوزىنىڭ ومىرلىك كاسىبى ەتىپ تاڭداعان. ەڭبەك اۋلەتىنىڭ جالپى تاجىريبە ءوتىلى 350 جىلعا تاتيدى.

باقىت ماقانوۆتىڭ ايتۋىنشا، «ەڭ الدىمەن ءوز ەڭبەگىنە دەگەن ادالدىق قانا ەمەس، قوعامعا شاراپاتى مول وسىناۋ ماماندىقپەن اينالىسۋدىڭ ءوزى - وتباسى ءۇشىن ماقتانىش».

سونىمەن قاتار ماراپاتقا لايىق دەپ تانىلعانداردىڭ ىشىندە 14 دوكتور شىققان تولەۋتايەۆتار مەن گيننەس رەكوردتار كىتابىنا اتتارى جازىلۋعا لايىق اۋلەت - ايتبەكوۆتەر وتباسى دا شاقىرىلعان. ولاردىڭ جانۇيالارىنان 20 ادام تەمىرجولشى ماماندىعىن تاڭداعان.

تالاي جىلدار بويى ءبىر ماماندىقتى اتادان بالاعا ميراس ەتىپ كەلە جاتقان وسى اۋلەتتەردىڭ اعا بۋىنىمەن تىلدەسۋگە استانا مەديسينالىق ۋنيۆەرسيتەتىنىڭ ستۋدەنتتەرى، كوللەدج جانە جوو وقۋشىلارى، كوشباسشىسى كىتاپحاناسى جانىنداعى «كەمەر ەل» جاستاردى تاربيەلەۋ ورتالىعىنىڭ مۇشەلەرى كەلدى.

ەڭبەك ادامدارىنىڭ ەستەلىكتەرى جينالعان جاستاردى ەلىكتەتكەنى سونشالىق، ستۋدەنتتەر ساۋالداردى كوپ جاۋدىردى.

ۇيىمداستىرۋشىلاردىڭ وزدەرى بۇل شارانىڭ باستى ماقساتى - ەڭبەك اۋلەتتەرىن قۇرمەتتەۋ، وسكەلەڭ ۇرپاقتىڭ بويىندا ادال ەڭبەككە دەگەن قىزىعۋشىلىعىن تۋدىرۋ، بولاشاق ماماندىعىنا دەگەن كوزقاراستارىن قالىپتاستىرۋ دەيدى.