قازاقستاندا مىندەتتى الەۋمەتتىك مەديسينالىق ساقتاندىرۋدىڭ جاڭا ءادىسى ىسكە قوسىلدى. ەندى سوڭعى 12 ايعا جارنا تولەۋدىڭ قاجەتى جوق، دەپ حابارلادى مەديسينالىق ساقتاندىرۋ قورى.
بۇعان دەيىن "مىندەتتى الەۋمەتتىك مەديسينالىق ساقتاندىرۋ تۋرالى" زاڭىنا وزگەرىس ەنگىزىلگەن بولاتىن. جاڭا نورماعا سايكەس، الداعى 12 ايعا جارنا تولەپ، مەديسينالىق قىزمەتتەردى پايدالانۋعا مۇمكىندىك بار.
قوردىڭ ءاقپاراتتىق-تۇسىندىرۋ جۇمىسى باسقارماسىنىڭ باسشىسى يرينا پودسكوچايانىڭ ايتۋىنشا، 2020 جىلدان بەرى جارنا تولەۋ بارلىعىنا بىردەي مىندەت. الايدا بەيرەسمي جۇمىس ىستەيتىندەردىڭ كوبىسى جارنا تولەمەيدى نەمەسە تولەمدى تۇراقتى جاسامايدى.
– ءمامس تۋرالى زاڭنىڭ جاڭا نورماسىن ەنگىزگەنگە دەيىن ساقتاندىرىلۋ مارتەبەسى وتكەن 12 اي ءۇشىن جۇيەلى تولەم بولعان كەزدە عانا بەرىلدى. سوندىقتان ءمامس تىزىمىنە كىرەتىن مەديسينالىق كومەك الۋ قاجەتتىگى تۋىنداعان كەزدە ساقتاندىرىلماعان ادامدار تولەم جاساماعان ايلار ءۇشىن جارنالاردى، ياعني بەرەشەكتى تولەۋى كەرەك ەدى. الايدا بۇل نۇسقا ءبارىنىڭ بىردەي كوڭىلىنەن شىقپادى. ەندى ساقتاندىرۋدىڭ بالامالى ءتاسىلى پايدا بولدى. الداعى 12 اي ءۇشىن جارنالاردى تولەۋگە مۇمكىندىك بار. بۇل جىل بويى مامس-تە مەديسينالىق كومەككە قول جەتكىزۋگە مۇمكىندىك بەرەدى، – دەيدى پودسكوچايا.
وسىلايشا، ساقتاندىرۋ مارتەبەسىن الۋ ءۇشىن سوڭعى ءبىر جىلدىڭ بەرەشەگىن جاۋىپ، مەديسينالىق قىزمەت الۋعا مۇمكىندىك بەرىلەدى. سونداي-اق الداعى 12 ايعا تولەپ، ءبىر جىل بويى پايدالانۋعا بولادى. جارنانى ەكىنشى دەڭگەيلى بانكتەر، بانكتەردىڭ ءموبيلدى قوسىمشالارى، قازپوشتا جانە تولەم تەرمينالدارى ارقىلى دەربەس تولەۋشى رەتىندە ءار اي ءۇشىن جەكە 3 000 تەڭگەدەن تولەۋ كەرەك.
"ازاماتتارعا ارنالعان ۇكىمەت" مەملەكەتتىك كورپوراسياسى بارلىق تولەمدى 2-3 كۇن ىشىندە وڭدەيدى. مەديسينالىق ساقتاندىرۋ بويىنشا بارلىق سۇراق بويىنشا ەمحانانىڭ پاسيەنتتەرگە قولداۋ كورسەتۋ قىزمەتىنە حابارلاسۋعا بولادى.
– ەگەر ول جەردە سىزگە كومەكتەسە الماسا، وندا وزىڭىزگە ىڭعايلى بايلانىس ارناسى ارقىلى الەۋمەتتىك مەديسينالىق ساقتاندىرۋ قورىنا - fms.kz رەسمي سايتى، 1406 بايلانىس ورتالىعى، Telegram-داعى SaqtandyryBot جانە Qoldau 24/ 7 ءموبيلدى قوسىمشاسىنا ءوتىنىش جىبەرە الاسىز. ءدال وسى قۇرالدار ارقىلى ساقتاندىرۋ مارتەبەسىن تەكسەرۋگە بولادى، - دەيدى ماماندار.
پىكىر قالدىرۋ