اقپان ايىنان بەرى قاماۋدا وتىرعان بەلسەندى، ساياساتكەر، تىركەلمەگەن دەموكراتيالىق پارتيانىڭ جەتەكشىسى جانبولات مامايدىڭ ءىسى سوتقا جىبەرىلدى. بۇل جونىندە بەلسەندىنىڭ ايەلى ينگا يمانباي حابارلادى.
"بۇگىن جانبولات ماماي مەن ادۆوكاتتارىنا ايىپتاۋ اكتىسى بەرىلىپ، ونىڭ ءىسى بوستاندىق اۋداندىق سوتىنا قىلمىستىق كودەكستىڭ ءۇش بابى بويىنشا جىبەرىلدى. قاڭتار بويىنشا 400 باپ (زاڭسىز ميتينگ ۇيىمداستىرۋ)، 378 باپ (پوليسياعا ءتىل تيگىزۋ)، 274 باپ (نەسيەلىك امنيستيا بويىنشا جالعان اقپارات تاراتۋ). جانبولات وزىنە تاعىلعان ايىپتىڭ ەشقايسىن مويىندامايدى، وزىنە قاتىستى ءىستىڭ بارلىعىن ساياسي جالا دەپ باعالايدى"، دەپ جازدى ينگا يمانباي facebook پاراقشاسىندا.
ينگا يمانباي جانبولات مامايدىڭ ءىسى بويىنشا كوپتەگەن ادام قۇقىعى جونىندەگى حالىقارالىق ۇيىمدارعا جۇگىنگەن. ادام قۇقىعى سالاسىنداعى حالىقارالىق Human Rights Watch جانە Amnesty International ۇيىمدارى ماسەلەگە نازار اۋدارىپ، بەلسەندىنى قۋدالاۋدىڭ ساياسي استارى بار ەكەنىن حابارلاپ، بيلىكتى مامايدى بوساتۋعا شاقىرعان.
جۋىردا ينگا يمانباي ەۋروپارلامەنت وتىرىسىنا ونلاين قاتىسىپ، ول جەردە دە ماماي ءىسىن ايتقان. ال ودان ءبىر كۇن بۇرىن جانبولات مامايعا تاعىلعان "جاپپاي تارتىپسىزدىك ۇيىمداستىردى" دەگەن ايىپ "بەيبىت جيىن وتكىزۋ ءتارتىبىن بۇزۋ" بابىمەن (400-باپ) الماستىرىلعان. ينگا يمانباي بيلىك مۇنداي قادامعا حالىقارالىق قىسىمنان كەيىن باردى دەپ سانايدى.
