بيىلعى قاڭتار-قىركۇيەك ايلارىندا ەل كاسىپورىندارى 13،5 ملرد دانا شىلىم، سيگار، پاپيروس جانە باسقا دا ۇقساس ونىمدەر شىعارعان. بۇل – وتكەن جىلمەن سالىستىرعاندا 15 پايىزعا ارتىق. اقشالاي ەسەپتەگەندە 206،5 ملرد تەڭگەنىڭ ءونىمى ءوندىرىلدى، دەپ حابارلادى energyprom.kz پورتالى.

2022 جىلعى سەگىز ايدىڭ قورىتىندىسى بويىنشا جەرگىلىكتى كومپانيالار شىلىمعا دەگەن ىشكى سۇرانىستىڭ 60،1 پايىىن قامتاماسىز ەتكەن. يمپورت ۇلەسى تيىسىنشە 39،9%.

ىشكى ساتىلىم وتكەن جىلمەن سالىستىرعاندا 27،1% ءوسىپ، 15،2 ملرد دانا بولدى.

بيىلعى ەكىنشى توقساندا ازاماتتاردىڭ تەمەكى ونىمدەرىنە جۇمساعان شىعىنى 11،2 مىڭ تەڭگەگە جەتتى، بۇل – ءبىر جىل بۇرىنعىدان 9،8% كوپ.

ەلدە سولتۇستىك قازاقستان وبلىسىنىڭ تۇرعىندارى كوپ تەمەكى شەگەدى: ەكىنشى توقساندا وبلىستاعى ءاربىر ءۇي ورتا ەسەپپەن تەمەكى ونىمدەرىنە 19،5 مىڭ تەڭگە جۇمساعان. ودان كەيىن پاۆلودار (18 مىڭ تەڭگە) جانە شىعىس قازاقستان (17،7 مىڭ تەڭگە) وبلىستارى جايعاسقان.

تەمەكى ونىمدەرىنە ەڭ از اقشا جۇمسايتىندار – شىمكەنتتىكتەر. ولار ايىنا شىلىمعا 1،7 مىڭ تەڭگە جۇمسايدى.

بيىلعى قازان ايىنىڭ قورىتىندىسى بويىنشا، ءفيلترلى سيگارەتتەر ءبىر جىلدا 16،4% قىمباتتاعان. باعا شىعىس قازاقستان (21،6%) جانە اقمولا (20،5%) وبلىستارى مەن الماتى قالاسىندا (19،3%) قاتتى وسكەن. ال باعانىڭ ءوسىمى تومەن ايماق الماتى وبلىسى (11%).