سىبايلاس جەمقورلىققا قارسى قىزمەت يندۋستريا جانە ينفراقۇرىلىمدىق دامۋ مينيسترلىگىنىڭ لاۋازىمدى تۇلعالارىنا قاتىستى سوتالدى تەرگەپ-تەكسەرۋ باستاعانىن حابارلادى.

"مينيسترلىكتىڭ لاۋازىمدى ادامدارى جەكەلەگەن كاسىپكەرلىك سۋبەكتىلەرىنىڭ مۇددەسىنە ساي ارەكەت ەتىپ، بارلاۋ سىلتاۋىمەن اۋكسيون وتكىزبەستەن پايدالى قاتتى قازبالار قورى بەلگىلەنگەن كەن ورىندارىن زاڭسىز بەرگەن. بۇرىن جۇرگىزىلگەن بارلاۋ دەرەگى قۇجاتتاردى بۇرمالاۋ ارقىلى ادەيى جاسىرىلعان. ناتيجەسىندە لاۋازىمدى تۇلعالارمەن ۇلەستەس كاسىپكەرلەر قول قويۋ بونۋسىنىڭ ەڭ تومەنگى قۇنى ءۇشىن نارىققا قاتىسۋشىلاردىڭ باسەكەلەستىك، قولجەتىمدىلىك جانە تەڭ قۇقىقتىلىق قاعيداتتارىن بۇزىپ، وندىرۋگە دايىن كەن ورىندارىن العان. كەن ورىندارىن ساتۋ بويىنشا اۋكسيوندار وتكىزىلمەگەندىكتەن، مەملەكەت ونداعان ميلليارد تەڭگە الماعان"، دەلىنگەن حابارلامادا. .

انتيكور 7 قاراشادا لاۋازىمدىق وكىلەتىن اسىرا پايدالاندى دەگەن كۇدىك بويىنشا بۇرىنعى يندۋستريا جانە ينفراقۇرىلىمدىق دامۋ ۆيسە-مينيسترى تيمۋر توقتابايەۆ ۇستالعانىن ءمالىم ەتتى.

"تەرگەۋ سوت سانكسياسىمەن تيمۋر توقتابايەۆتىڭ جانە ونىڭ جاقىن تۋىستارىنىڭ (ەليتالىق جەكە ۇيلەر، جەر ۋچاسكەلەرى، Cadillac Escalade ماركالى اۆتوكولىكتەرى، Mercedes-Benz Maybach S580 4 Matic، ەكى BMW X5 Xdrive40I، Bentley Bentayga V8) قىمبات جىلجىمالى جانە جىلجىمايتىن مۇلكى انىقتالدى جانە بۇعاتتالدى"، - دەپ حابارلادى  ۆەدومستۆونىڭ باسپا ءسوز قىزمەتى.