دەپۋتات دينارا زاكييەۆا قازاقستاندىق 6 ملن 750 مىڭ وتباسىنىڭ جارتىسىنا جۋىعىنا قولداۋ قاجەتتىگىن ايتىپ قارجى ءمينيسترى ەرۇلان جاماۋبايەۆقا دەپۋتاتتىق ساۋال جولدادى.

دەپۋتاتتىڭ سوزىنشە، 1 145 100 وتباسى داعدارىس جاعدايىندا تۇرىپ جاتسا، 1 592 600 وتباسى وتە قيىن جاعدايدا.  

"اتالعان ساناتتاعى بارلىق وتباسىعا كەشەندى كومەك، الەۋمەتتىك وڭالتۋ، سۇيەمەلدەۋ، جۇمىسقا ورنالاسۋعا كومەك كورسەتۋ، قۇجاتتاندىرۋ، جاردەماقىلار، تولەمدەر، ااك جانە باسقا دا قىزمەتتەر قاجەت. سوندىقتان بارلىق قىزمەتتى ءبىر تەرەزەدە الۋدى قامتاماسىز ەتۋ ءۇشىن ەلىمىزدىڭ ءار اۋدانىندا ينفراقۇرىلىم، اتاپ ايتقاندا، وتباسىن قولداۋ ورتالىقتارىن قۇرۋ قاجەت. ءقازىر ەلدە 220 اۋدانعا تەك 47 وتباسىن قولداۋ ورتالىعى بار. مىسالى، تۇركىستان وبلىسىندا 14 اۋدان مەن ءۇش قالا، 2 ميلليوننان استام حالىق بار. 330 مىڭ وتباسى توتەنشە قيىن جانە داعدارىستى ومىرلىك جاعدايدا تۇرادى، وبلىستا زورلىق-زومبىلىق دەڭگەيى دە جوعارى. وبلىس بويىنشا تەك ەكى داعدارىس ورتالىعى بار، ءبىر وتباسىن قولداۋ ورتالىعى ەندى اشىلىپ جاتىر. ۇشەۋى دە تۇركىستان قالاسىندا ورنالاسقان. قيىن ومىرلىك جاعدايعا تاپ بولعان وتباسىنىڭ، بالالى ايەلدىڭ شالعايدا جاتقان اۋىلدان ورتالىق ىزدەپ جۇزدەگەن كيلومەتر ءجۇرىپ باراتىن نە كۇشى، نە قارجىلىق مۇمكىندىگى جوق. رەسپۋبليكانىڭ باسقا وڭىرلەرى بويىنشا دا وسىنداي جاعداي. وكىنىشكە قاراي وتباسىلاردىڭ الەۋمەتتىك ماسەلەلەرىنىڭ شەشىلمەۋى جانە ولارعا ۋاقتىلى كومەك كورسەتۋ مۇمكىندىگىنىڭ بولماۋى كوپ جاعدايدا قايعىلى سالدارعا اكەلىپ ءجۇر. مۇنداي مىسالدار بىزدە جەتكىلىكتى" دەلىنگەن دەپۋتاتتىڭ ساۋالدا.

دينارا زاكييەۆانىڭ ايتۋىنشا، اشىلۋى 2022 جىلعا جوسپارلانعان 45 ورتالىقتىڭ بۇگىندە 21ء-ى اشىلعان، تاعى 19 ورتالىق جىلدىڭ سوڭىنا دەيىن اشىلماق.

"2023-2025 جىلدار ارالىعىندا تاعى 158 ورتالىق اشۋ قاجەت. بۇل جەرگىلىكتى بيۋدجەتتەر ەسەبىنەن بولجانعان ەدى. الايدا اتالعان ورتالىقتاردى اشۋ ءۇشىن وڭىرلەردە قاراجات جوق. وسىعان بايلانىستى وسىنداي الەۋمەتتىك ماڭىزى بار باعىتتى تولىققاندى ىسكە اسىرۋ ءۇشىن 2023-2025 جىلدارى ورتالىقتار قۇرۋعا ورتالىقتاندىرىلعان قارجىلاندىرۋدى قاراستىرۋدى سۇرايمىز" دەيدى دەپۋتات.