بۇگىن بەلگىلى ساتيريك، جۋرناليست كوپەن امىربەك قايتىس بولدى. بۇعان دەيىن ساتيريك استاناداعى كوپسالالى ونكولوگيا اۋرۋلارىن ەمدەيتىن ورتالىقتا حيرۋرگيالىق وتا جاساتقانى، قوسىمشا ەم الىپ جاتقانى حابارلانعان. ەمىنە 17 ميلليون تەڭگە قارجات كەرەكتىگى تۋرالى دا اقپارات تاراعان.

كوپەن امىربەك 1950 جىلى 29 ناۋرىزدا تۇركىستان وبلىسى وتىرار اۋدانى ەشكىقورا اۋىلىندا دۇنيەگە كەلگەن.

1975 جىلدان بەرى شىعارماشىلىقپەن اينالىسىپ كەلەدى. "قازاق ادەبيەتى"، "ەگەمەن قازاقستان" گازەتتەرىندە ساتيرا، فەلەتون ءبولىمىنىڭ مەڭگەرۋشىسى، "ءبىلىم جانە ەڭبەك"، "ارا - شمەل" جۋرنالىندا جاۋاپتى حاتشى، رەسپۋبليكانىڭ باس پروكۋراتۋراسى مەن جوعارعى سوتتا باسپا ءسوز حاتشىسى بولىپ ۇزاق جىلدار بويى قىزمەت ىستەگەن.

ول – "ارا" جۋرنالىنىڭ باس رەداكتورى، قازاق راديوسى ديرەكتورىنىڭ ورىنباسارى بولعان. قازاقستان جازۋشىلار وداعى باسقارماسى ساتيرا كەڭەسىنىڭ ءتوراعاسى، ماسكەۋ  مەن تاشكەنتتە وتكەن بۇكىلوداقتىق جاس ساتيريكتەر كونكۋرسىنىڭ لاۋرەاتى.

ءار جىلدارى جارىق كورگەن "اتى جوق كىتاپ"، "الىپ"، "ءتىلىم قىشىپ بارادى"، "قىسىر اڭگىمە"، "اۋىزباستىرىق"، "مىڭ ءبىر مىسال"، "نەمەنەڭە جەتىسىپ كۇلەسىڭ؟"، "ءوزىڭدى تانيسىڭ با؟"، "سايداعى قويشىدان سارايداعى پاتشاعا دەيىن" اتتى ءازىل-سىقاق، پاروديا كىتاپتارى ارقىلى وقىرماندارعا كەڭىنەن تانىلعان. "تاماشا" ويىن-ساۋىق وتاۋىنىڭ بەلسەندى اۆتورى بولعان. ءوزى قۇرعان "كوپەن كەلە جاتىر!.." ءازىل-سىقاق، پاروديا تەاترىمەن دە كورەرمەندەردىڭ كوزايىمىنا اينالعان.