پرەمەر-مينيستر ءاليحان سمايىلوۆ جەمقور دەپ تانىلعانداردان تاركىلەنگەن اقشاعا مەكتەپ قۇرىلىسى قالاي جۇرگىزىلەتىنىن ءتۇسىندىردى، دەپ حابارلادى Ulysmedia.kz سايتى.
"ءبىز زاڭناماعا، بيۋدجەت كودەكسىنە ارنايى نورمالار ازىرلەدىك. وندا مۇنداي (تەركىلەنگەن) اقشانى الۋعا بولاتىن قارجى مينيسترلىگى جانىنان ارنايى بولەك شوت قاراستىرىلعان. قۇقىق قورعاۋ ورگاندارى بۇل جۇمىستى قامتاماسىز ەتەدى. ءتيىستى شەشىم شىعارىلعان جەمقورلار ءۇشىن قارجى قارجى مينيسترلىگىنىڭ ارنايى شوتىنا ءتۇسىپ جاتىر" دەدى ءاليحان سمايىلوۆ سەنات كۋلۋارىندا جۋرناليستەردىڭ سۇراقتارىنا جاۋاپ بەرە وتىرىپ.
سمايلوۆتىڭ سوزىنشە، ءقازىردىڭ وزىندە بيۋدجەتكە شامامەن 50 ملرد تەڭگە تۇسكەن.
"ءبىز جاقىن ارادا بۇل سوما 100 ملرد تەڭگەگە دەيىن وسەدى دەپ كۇتۋدەمىز. بۇل قاراجات مەكتەپ جەتىسپەيتىن وڭىرلەردە، ءۇش اۋىسىمدىق ءبىلىم بەرەتىن، توتەنشە جاعداي ورىن العان وڭىرلەردە مەكتەپ سالۋعا باعىتتالاتىن بولادى" دەدى ول.
پىكىر قالدىرۋ