بۇرىنعى دەنساۋلىق ساقتاۋ ءمينيسترى ەلجان ءبىرتانوۆتىڭ ادۆوكاتتارى استانا قالاسى №2 سارىارقا سوتىنىڭ ۇكىمىنە اپەللياسيالىق شاعىم ءتۇسىردى، دەپ حابارلادى Ulysmedia.kz. سايتى.
ادۆوكات دميتريي كۋرياچەنكونىڭ سوزىنشە، ۇكىمگە نارازىلىق ءبىلدىرۋ مەرزىمى 12 قاراشادا اياقتالادى. بۇگىنگى كۇنى كۋرياچەنكو مەن ادۆوكات سەرىك ساعالييەۆ الدىن الا اپەللياسيالىق شاعىم تۇسىرگەن. قالعان قورعاۋشىلار دا جوعارى تۇرعان ينستانسياعا – استانا قالالىق سوتىنا جۇگىنۋ ءۇشىن شاعىم دايىنداۋدا.
كۋرياچەنكونىڭ ايتۋىنشا، ەكس-مينيستردىڭ قورعاۋشىلارى سوت ۇكىمىنىڭ ونى لاۋازىمدىق وكىلەتتىكتەرىن تەرىس پايدالانعانى ءۇشىن كىنالى دەپ تاپقان بولىگىنە نارازى.
28 قازاندا سوت ءبىرتانوۆتى 5 جىلعا، ال ونىڭ ورىنباسارى ولجاس ابىشيەۆتى 4 جىلعا باس بوستاندىعىن شەكتەۋ تۋرالى ۇكىم شىعارعان. ەلجان ءبىرتانوۆ “ساناۆياسيانى زاڭسىز پايدالاندى” دەگەن ايىپ بويىنشا اقتالعانىمەن "لاۋازىمىن اسىرا پايدالاندى" دەگەن باپ بويىنشا ايىپتى دەپ تانىلدى. ەكەۋى سوت ۇكىمى بويىنشا "كەلتىرىلگەن" 1 ملرد 350 ملن تەڭگە شىعىندى وتەۋگە مىندەتتەلدى.
پىكىر قالدىرۋ