قازىرگى كەزدە تۇماۋ، جرۆي ءورشىپ تۇر. ەرەسەكتەر اراسىندا ءاربىر 10-شى ادام اۋىرسا، بالالار اراسىندا ءاربىر 3ء-شى بالا اۋىرادى. بۇل ۋاقىتتا بالالاردىڭ اۋىرعانىنا اتا-انالار كوڭىل ءبولۋ كەرەك. اۋرۋدىڭ 80% جەڭىل تۇردە وتەدى. بۇل تۋرالى ورتالىق كوممۋنيكاسيالار قىزمەتى الاڭىندا "استانا مەديسينا ۋنيۆەرسيتەتى" اق بالالار جۇقپالى اۋرۋلارى كافەدراسىنىڭ مەڭگەرۋشىسى ديناگۇل باەشيەۆا ءمالىم ەتتى.
"بۇعان قاراماستان ءبىرىنشى كۇننەن باستاپ بالامەن بىرگە اتا-اناسى ۇيدە قالۋى كەرەك. ونى مەكتەپكە جانە ت.ب. جەرلەرگە اپارماۋ قاجەت. سەبەبى ول بالاباقشادا، مەكتەپتە اۋرۋدى باسقالارعا جۇقتىرۋى نەمەسە ونى اسقىندىرىپ الۋى مۇمكىن. تۇماۋدىڭ ءقاۋىپتى كلينيكالىق كورىنىستەرى: تەمپەراتۋرا كوتەرىلىپ، تۇسپەسە، جوتەل پايدا بولسا. سونداي-اق قۇسۋ، باس اۋرۋى، تەمپەراتۋرا جوعارى بولسا، بۇل ميدىڭ زاقىمدانۋىنىڭ بەلگىسى بولۋى ىقتيمال. سوندىقتان بۇل جاعدايدا بالانى دارىگەرگە كورسەتكەن ءجون. بالانىڭ داۋىسى وزگەرىپ، قارلىعىپ كەتسە، ەنتىكپە بولسا، ول دا ءقاۋىپتى. بالاعا نەعۇرلىم ەرتەرەك كوڭىل بولسەڭىز، ول سوعۇرلىم تەز جازىلادى" دەيدى مامان.
سانيتاريالىق-ەپيدەميولوگيالىق باقىلاۋ كوميتەتى ءتوراعاسىنىڭ ورىنباسارى مارال راقىمجانوۆانىڭ مالىمەتىنشە، 1 قازاننان باستاپ ەل بويىنشا 1 ملن 27 مىڭ جرۆي جاعدايى تىركەلگەن.
"جىل سايىن قازاننان باستاپ ساۋىرگە دەيىنگى ارالىقتا ءجىتى رەسپيراتورلىق-ۆيرۋستىق ينفەكسيالارمەن (جرۆي) جانە تۇماۋمەن سىرقاتتانۋ ماۋسىمى باستالادى. دۇنيەجۇزىلىك دەنساۋلىق ساقتاۋ ۇيىمىنىڭ (ددۇ) دەرەكتەرى بويىنشا الداعى ەپيدەميالىق ماۋسىمدا ۆيرۋستىڭ ءۇش شتاممى وزەكتى بولادى – A(H1N1)، A(H3N2) جانە B، ولار 2022/2023 ەپيدەميالىق ماۋسىمعا ارنالعان ۆاكسينانىڭ قۇرامىنا ەنگىزىلگەن" دەيدى ول.
مارال راقىمجانوۆا قازىرگى تۇماۋ كەنەتتەن باستالىپ، تەمپەراتۋرا كۇرت جوعارىلايتىنىن ايتادى.
"دەنەنىڭ ايقىن ينتوكسيكاسياسى بايقالادى، قالتىراۋ، اديناميا، بۇلشىقەتتىڭ جانە باستىڭ اۋىرۋى، دەنەنىڭ سىرقىراۋى سياقتى بەلگىلەرى بولادى. كەز كەلگەن باسقا ۆيرۋستىق ينفەكسيا كەزىندە ادەتتە كاتارالدىق بەلگىلەر باسىم بولادى، سودان كەيىن وسى كاتارالدىق بەلگىلەرمەن بىرگە تەمپەراتۋرا پايدا بولادى. ادامدار كوپ جينالاتىن ورىندارعا، اسىرەسە جابىق بولمەلەرگە بارۋدى شەكتەۋ، بولمەلەردى جەلدەتۋ، انتيسەپتيكالىق قۇرالداردى پايدالانىپ، دەزينفەكسيالىق رەجيمدى كۇشەيتۋ، قولدى وڭدەۋ ءۇشىن انتيسەپتيكتەردى نەمەسە دەزينفەكسيالىق سۋلىقتاردى پايدالانۋ، ناۋقاس ادامدارمەن بايلانىستى شەكتەۋ، ولاردى وقشاۋلاۋ، اۋىرعانداردىڭ 80%-ى بالالار ەكەنىن ەسكەرە وتىرىپ، تۇماۋ مەن جرۆي بەلگىلەرى پايدا بولعان كەزدە بالالاردى ۇيدە قالدىرىپ، ۇيىمداسقان ۇجىمدارعا جىبەرمەۋ كەرەك. سونداي-اق مەديسينالىق كومەككە ۋاقىتىلى جۇگىنۋ كەرەك" دەدى مامان.
