باسىلىم رەسەي وتكەن ايدا گازدى ءۇشىنشى ەلدەرگە، سونىڭ ىشىندە قىتايعا جەتكىزۋدى قولداۋ ماقساتىندا قازاقستان جانە وزبەكستانمەن گاز وداعىن قۇرۋدى تالقىلاپ جاتقانىن حابارلاعانىن اتاپ وتكەن.
وزبەك ءمينيسترى جورابەك مىرزاماحمۇدوۆ وزبەكستانعا ازىرگە ۇسىنىس تۇسپەگەنىن، ءتىپتى رەسەيمەن گازعا بايلانىستى كەلىسىم جاسالعانىمەن، ول وداق دەگەندى بىلدىرمەيتىنىن ايتتى.
"ەگەر ءبىز وزگە ەلدەردەن گازدى يمپورتتاساق، ول تەك ساتۋ-ساتىپ الۋ كوممەرسيالىق كەلىسىم-شارتى اياسىندا سەرىكتەستىك قۇرامىز. گازدى ساياسي شارتتارعا ايىرباستامايمىز. قىسقاسى، گاز كەلىسىم-شارتى سوعان كەلىسكەندە عانا قابىلدايمىز، ولاي بولماعان جاعدايدا باس تارتامىز" دەدى مينيستر.
Reuters وزبەكستاننىڭ رەسەي ۇسىنىسىنا سالقىن قاراۋى ماسكەۋدىڭ بۇرىنعى وداقتاس رەسپۋبليكالارعا ءسوزىن وتكىزۋدە قيىندىق تۋىپ جاتقانىن كورسەتەدى دەپ سانايدى.
رەسەي تاراپى جوعارىدا اتالعان ۇسىنىستى 28 قاراشا كۇنى پرەزيدەنت قاسىم-جومارت توقايەۆتىڭ رەسەيگە ساپارى بارىسىندا جاساعان. ونى رەسەي پرەزيدەنتى ۆلاديمير پۋتين ءوزى ايتقان. قازاقستان ماسەلەنى زەردەلەيتىنىن جەتكىزگەن.
قازاقستان مەن وزبەكستان رەسەيدىڭ ۋكرايناعا باسقىنشىلىعىن رەسمي دەڭگەيدە قولدامايدى دا، ايىپتامايدى دا. كەي ساراپشىلار، مۇنداي بەيتاراپتىقتى ماسكەۋدەن الشاقتاۋدى بىلدىرەتىنىن، رەسەيدىڭ ساياسي ىقپالى مەن ەكونوميكالىق ۇستەمدىگى الشاقتىقتى اشىق كورسەتۋگە مۇمكىندىك بەرمەيتىنىن ايتادى. الايدا جۋىرداعى پرەزيدەنت بولىپ سايلانعان ق.توقايەۆ انت قابىلداۋ راسىمىنەن كەيىن بىردەن رەسەيگە ساپارمەن بارىپ كەلدى.
پىكىر قالدىرۋ