قازاقستاننىڭ قارجى مونيتورينگى اگەنتتىگى قاماۋعا العان جۋرناليست ميحايل كوزاچكوۆتىڭ حاتى تاراپ جاتىر. ونى جۋرناليست ۆاديم بورەيكو facebook پاراقشاسىنا جاريالادى. 

جۋرناليست حات ءماتىنىن الەۋمەتتىك جەلىدەگى چاتتاردان العانىن،الايدا ادۆوكاتتارعا حابارلاسىپ حات كوزاچكوۆتىكى ەكەنىنە كوز جەتكىزگەنىن ايتادى.

كوزاچكوۆ حاتتىڭ باسىندا ءبىر تاۋلىكتەن استام ۋاقىت بويى وزىنە تاعىلعان ايىپتى دالەلدەي الماي جاتقانىن جازادى. 

"وسىعان بايلانىستى مەن كۋالىك بەرە المايمىن. كۇنى بويى ادۆوكاتتارمەن ءتيىستى شەشىمدى كۇتىپ وتىرامىز. قارجى مونيترينگ اگەنتتىگىنىڭ حابارلامالارى ارقىلى مەنى رەيدەرلىك جاسادى، ۇيىمداسقان قىلمىستىق توپقا قاتىسى بار، مەملەكەتتىك قۇپيانى تاراتتى دەپ ايىپتاپ وتىرعانىن ءتۇسىندىم" دەيدى جۋرناليست. 

كوزاچكوۆ ماقالاسىنداعى مالەمەتتەردى اشىق دەرەككوزدەردەن الاتىنىن، قۇپيا دەرەكتەر بازاسىن اشپاعانىن اتاپ وتكەن.

"رەيدەرلىك" پەن "ۇيىمداسقان قىلمىستىق توپ" دەگەنى – "ەسەنتاي سيتي" مەن وزگە دە نىساندار توڭىرەگىندەگى اتى شۋلى ءىس. مەنىڭ تۇسىنۋىمشە مەنىڭ "قىلمىسىم" – "جىمقىردى" دەپ ايىپتالعان الماس ءابدىعاپپاروۆ تۋرالى ماقالا جازعانىم. رەستوراتور ميلليون دوللار كولەمىندەگى قارجىنى جىمقىرعان. بۇل تەرگەۋ كەزىندە دە، سوت ارقىلى دا دالەلدەنگەن. الايدا پروكۋرور مەن سۋديا ەشقايسىسىن رەيدەرلىك جاسادى دەپ ايىپتامايدى. الايدا وسى ماسەلەگە قاتىستى ماقالا جازعان ءجۋرناليستى تۇتقىندايدى" دەلىنگەن حاتتا.

جۋرناليست ۇستالۋىن قارجى مونيتورينگى اگەنتتىگىنىڭ ءتوراعاسى جانات ەليمانوۆتىڭ جەكە باسىنا دەگەن وشپەندىلىگىمەن بايلانىستىرادى. كوزاچكوۆتىڭ ايتۋىنشا، جازدا جانات ەليمانوۆ وزىنە وشتەسىپ جۇرگەنىن، قاماۋ تۋرالى ويى بارىن ەستىگەن.

"اگەنتتىك قىزمەتكەرى قارجى مونيتورينگ اگەنتتىگىنىڭ جۇمىسىنا كەدەرگى كەلتىرىپ جۇرگەندىكتەن مەنى قاماۋعا العىسى كەلەتىنىن ايتقان ەدى. ال قاراشا ايىندا بيزنەسمەن گادجي گادجييەۆ ەليمانوۆتىڭ مەنى تۇتقىنداۋى مۇمكىن ەكەنىن ەسكەرتتى. ونىڭ ايتۋىنشا، ەليمانوۆقا ونىڭ ايەلىنە قاتىستى جازعان ماقالام ۇناماپتى. ءيا مەن قارجى پيراميداسىنىڭ قۇربانىنا اينالعان ەليمانوۆتىڭ ايەلى جونىندە ماقالا جازعانمىن. مەن گادجيگە ولاردىڭ ءىسىن جازۋىمدى وتىنگەن باسقا جابىرلەنۋشىنىڭ حاتىن كورسەتتىم. ماعان قارجىلىق قىلمىسقا قارسى باستى كۇرەسكەردىڭ ايەلى قارجى پيراميداسىنىڭ كليەنتى بولعانى وعاش كورىندى. سول ءۇشىن دە جازدىم. ال جانات ەليمانوۆ سوعان رەنجىپ قالعانعا ۇقسايدى" دەيدى كوزاچكوۆ. 

بيزنەسمەن گادجييەۆ اگەنتتىك توراعاسىمەن سويلەسۋگە ۋادە بەرگەن. ءبىراق كوزاچكوۆ ول ءۇشىن ماقالاعا تۇسىنىكتەمە جاساپ، جازبا جاريالاۋعا مىندەتتەلگەن. كوزاچكوۆ ۇسىنىستان باس تارتقان. 

"مەن بۇعان دەيىن كوپتەگەن قىلمىستىق وقيعالار جونىندە جازدىم. الايدا بۇعان مەن كىنالى ەمەسپىن. مەن تەك اڭقاۋ بولعانىم ءۇشىن، قاڭتار وقيعاسىنان كەيىن جاڭا ءارى ادىلەتتى قازاقستان قۇرىلاتىنىنا سەنگەنىم ءۇشىن كىنالىمىن" دەپ جازعان جۋرناليست. 

بۇدان بولەك جۋرناليست تاپسىرىسپەن ماقالا جازىپ، 52 ملن تەڭگە العانى جونىندەگى اقپاراتتى جوققا شىعاردى. 

"مەن ايىپتاۋلاردان قورىقپايمىن. مەن العان ميلليونداردى كورسەتۋىڭىزدى سۇرايمىن. بۇل ايىپتار سوتتا بۇكىل حالىقتىڭ الدىندا قالاي دالەلدەنەتىنىن كورەيىك"، دەيدى ميحايل كوزاچكوۆ.

قما ءجۋرناليستى قوعامدىق پىكىر قالىپتاستىرۋ ارقىلى قىلمىسكەرلەرگە بولىستى، اقپاراتتىق شابۋىل ۇيىمداستىردى، جالعان مالىمەت تاراتتى، ادام بەدەلىنە نۇقسان كەلتىرەتىن ماقالالار جاريالادى، مەملەكەتتىك قۇپياعا جاتاتىن اقپاراتتاردى جيناپ، تاراتتى دەپ ايىپتاپ وتىر. ورگان دەرەگىنشە، جۋرناليست وسى قىزمەتى ءۇشىن قوماقتى سىياقى العان.

ءبىرقاتار بەلسەندى ازاماتتار مەن كوزاچكوۆتىڭ ارىپتەستەرى بولىپ جاتقان وقيعانى قۇقىقتىق سالا، سوت جۇيەسى تۋرالى وتكىر جازاتىن ءجۋرناليستىڭ اۋزىنا قاقپاق بولۋ ارەكەتى دەپ سانايدى.