ءماجىلىستىڭ زاڭناما جانە سوت-قۇقىقتىق رەفورما كوميتەتىنىڭ ءتوراعاسى، دەپۋتات ارمان قوجاحمەتوۆ جاقىن ارادا پالاتا تاراتىلۋى مۇمكىن ەكەنىن ايتتى، دەپ جازادى قازاقپارات. 

– بۇل جايىندا پرەزيدەنت (جولداۋدا) ايتقان بولاتىن. ياعني، بيىلدىڭ ءبىرىنشى جارتىسىندا ءتيىستى شەشىم قابىلداناتىنى ءمالىم بولدى. اتاپ ايتقاندا، نورماتيۆتىك-قۇقىقتىق بازا دايىندالدى، سونداي-اق ءتيىستى زاڭدارعا سايلاۋعا قاتىستى تۇزەتۋلەر دە ەنگىزىلدى. سوندىقتان جاقىن ارادا ءتيىستى قادامدار جاسالۋى مۇمكىن، – دەگەن ا. قوجاحمەتوۆ ءماجىلىستىڭ جالپى وتىرىسىنان كەيىن تىلشىلەر سۇراعىنا جاۋاپ بەرە وتىرىپ.

Informburo.kz پورتالىنىڭ مالىمەتىنشە، دەپۋتات تومەنگى پالاتا وسى ايدا تاراۋى مۇمكىن ەكەنىن، وعان دەپۋتاتتاردىڭ وزدەرى باستاماشىل بولۋى ىقتيمال ەكەنىن ايتقان.

بۇعان دەيىن ءماجىلىس كەلەسى اپتادا مەرزىمىنەن بۇرىن تاراتىلۋى مۇمكىن ەكەنى جونىندە اقپارات شىققان.