ءانشى ءمادينا ءسادۋاقاسوۆانىڭ رەسمي نەكە قيۋ ءراسىمى 2 اقپان كۇنى الماتىداعى ورتالىق احاج بولىمىندە بولدى. بۇعان دەيىن بۇقارالىق اقپارات قۇرالدارىندا 2014 جىلدىڭ 8 قاڭتارىندا ءمادينا ءسادۋاقاسوۆا مەن "حابار" تەلەارناسىنىڭ رەجيسسەرى ولجاس سماعۇلوۆ قۇپيا تۇردە نەكەلەرىن زاڭداستىردى دەگەن اقپاراتتار تاراعان بولاتىن. ەكى جاستىڭ تويى الماتىداعى مەيرامحانالاردىڭ بىرىندە ءوتتى. قازاق ەستراداسىنداعى سۇلۋ دا سىمباتتى ءانشى ءمادينا ءسادۋاقاسوۆا ۇيلەنۋ تويىندا ەكى كويلەك كيدى. ونىڭ ءبىرىن ءوزىنىڭ جاقىن دوسى، جەكە ديزاينەرى تىككەن ەكەن. تويعا جاس جۇبايلاردىڭ دوستارى، تۋىستارى، ارىپتەستەرى، بارلىعى 300-دەي ادام جينالدى. "ولجاس تۇرمىسقا شىعۋ تۋرالى ۇسىنىستى ماعان قىركۇيەك ايىندا مەنىڭ تۋعان كۇنىمدە جاساعان بولاتىن. ول مەنى مەيرامحاناعا اپارىپ، گۇل، iPhone جانە ۇستىندە نەكە ساقيناسى بار تورت سىيلادى. مەن، ارينە، كەلىسىمىمدى بەردىم. ۇيلەنۋ تويىمىزدى 2 اقپان كۇنى ولجاستىڭ تۋعان كۇنىندە وتكىزەمىز دەپ شەشكەن ەدىك"،– دەدى ءمادينا ءسادۋاقاسوۆا. ءمادينا ءوزىنىڭ بولاشاق كۇيەۋىمەن وسىدان ءتورت جىل بۇرىن "تاڭ قالماڭىز" باعدارلاماسىنىڭ ءتۇسىرىلىمى كەزىندە تانىسقان. ول كەزدە ولجاس سماعۇلوۆ رەجيسسەردىڭ كومەكشىسى بولىپ قىزمەت اتقارعان. ولجاس بەلگىلى جازۋشى قابدەش ءجۇمادىلوۆتىڭ نەمەرەسى. كۇيەۋ جىگىت ءمادينادان 6 جاس كىشى. ءمادينا تۇرمىسقا شىققان سوڭ تەگىن اۋىستىرماۋعا شەشىم قابىلداپتى. ەسترادا جۇلدىزىنىڭ بۇل ەكىنشى رەت تۇرمىسقا شىعۋى. ءبىرىنشى كۇيەۋىمەن ول ءبىر جارىم جىلداي وتاسىپ، 2008 جىلى رەسمي تۇردە اجىراسقان بولاتىن. ءمادينا ءسادۋاقاسوۆا 1999 جىلعى "جاس قانات" جاستار بايقاۋىنىڭ جەڭىمپازى، ول پرەزيدەنت وركەسترىنىڭ جانە "گۇلدەر" ءانسامبىلىنىڭ ءانشىسى بولىپ جۇمىس ىستەدى. تاياۋدا وتكەن "قازاقستان داۋىسى" بايقاۋىندا تالىمگەر بولدى.