«استانا» پرەزيدەنتتىك كلۋبىنا قوسىلساڭ، «ارلاندار» ساپىنا قايتا قابىلداۋعا دايىنبىز، دەپ باقتيار ارتايەۆ ارنايى كەزدەسىپ، ۇسىنىستارىن ايتتى. باقتيار عانا ەمەس، «استانا ارلاندارى» كاسىبي بوكس كلۋبىنىڭ ديرەكتورى بولات مانكەنوۆ اعامىز دا قايتا كەلۋىمدى سۇراعان. ريو-دە-جانەيرو وليمپياداسىنا جولداماعا تالاسۋىما مۇمكىندىك بار ەكەنىن دە ايتتى. مەن باس تارتتىم، - دەيدى بوكسشى قانات يسلام «Sport» باسىلىمىنا بەرگەن سۇحباتىندا. بۇل تۋرالى alaman.kz سايتى جازادى.سايتتا سونداي-اق سوڭعى كەزدەرى بوكس جانكۇيەرلەرى اراسىندا «قانات يسلامنىڭ «ارلاندار» ساپىنا قايتىپ ورالۋى مۇمكىن»، دەگەن اڭگىمەنىڭ ءجيى ايتىلىپ جۇرگەنى تۋرالى جازىلعان. «وزدەرىڭىزگە بەلگىلى، مەن ءقازىر كاسىپقوي بوكستا ءجۇرمىن. ءبىر جىلدا 16 كەزدەسۋ وتكىزىپ، بارلىعىندا جەڭىسكە جەتتىم. ونىڭ 14ء-ى نوكداۋن، 2ء-ۋى نوكاۋت. 15ء-شى كەزدەسۋىمدە كولۋمبيالىق ەميليو حۋليو حۋليونى جەڭگەننەن كەيىن، WBA تۇجىرىمى بويىنشا ورتاشا جەڭىل سالماقتا Fedecaribe (امەريكا جانە كاريب تەڭىزى ايماعى چەمپيونى) چەمپيونى اتاندىم. بۇل - الەم چەمپيونى اتاعىنا جاقىنداۋ دەگەن ءسوز. وسىنداي دەڭگەيگە جەتىپ الىپ، كاسىپقوي بوكستى قالاي تاستاپ كەتەمىن؟! سوندىقتان، كەلىسىم بەرگەن جوقپىن»،-دەيدى ول.