سيرياداعى جەر سىلكىنىسىنەن قازا تاپقانداردىڭ سانى 1600-دەن اسقان. 3649 ادام اۋىر جاراقات العان. شام ولكەسىنىڭ باسشىلىعى باتىس ەلدەرىن سانكسيالاردى الىپ تاستاپ، كومەك كورسەتۋىن سۇرايدى.، دەپ حابارلادى Birgun.net سايتى.

سيريادا قۇتقارۋ جۇمىستارى وتە باياۋ ءجۇرۋىپ جاتىر. جۋرناليست ساركيس كاساردجياننىڭ ايتۋىنشا، قازا تاپقاندار سانى ساعات سايىن ارتا تۇسۋدە، سونداي-اق ول سيرياعا حالىقارالىق كومەك كورسەتىلمەي جاتقانىن جەتكىزدى.

"قازا تاپقانداردىڭ سانى رەسمي مالىمەتتەن قاراعاندا كوپ. قۇتقارۋ جۇمىستارى بولسا وتە باياۋ. ەلىمىزدەگى بارلىق ادام قۇتقارۋ جۇمىستارىنا جۇمىلدىرىلسا دا حالىق مۇنداي جاعدايدا جۇمىس ىستەۋگە داعدىلانباعان. تابيعي اپاتتار كەزىندەگى جۇمىستار اتقارۋدا تاجىريبەمىز از. قۇتقارۋ جۇمىستارىنا تاجىريبەسى جوق ماماندار جۇمىلدىرىلىپ، ارنايى قۇرال-جابدىقتىڭ بولماۋىنان قازا تاپقانداردىڭ سانى ارتۋى مۇمكىن"، دەيدى جۋرناليست. 

ال Hurriyet باسىلىمىنىڭ حابارلاۋىنشا، سيريالىق ساياساتكەر، بۇۇ وكىلى باسسام ساباح بارلىق ەلدەردى سيريانى دارى-دارمەك، ازىق-تۇلىكپەن قامتاماسىز ەتىپ، كومەك كورسەتۋگە شاقىرعان. 

SANA مەملەكەتتىك باسىلىمى يران مەن يراك تاراپىنان سيرياعا گۋمانيتارلىق كومەك كورسەتىلىپ جاتقانىن جازدى. ازىق-تۇلىك، دارىلىك پرەپاراتتارمەن قاتار مەديسينالىق قىزمەتكەرلەر كەلگەن. 

حالىقارالىق مەملەكەتتىك ەمەس ۇيىمدار تۇركيانىڭ سولتۇستىگى مەن سيرياعا كومەك رەتىندە ارنايى ناۋقان باستادى. تانىمال امەريكالىق تەلەجۇرگىزۋشى ەللەن دە دجەنەرەس قورعا 3،5 ميلليون دوللار اۋدارىپ، ناۋقاننىڭ باستالعانىن حابارلادى. 

بۇدان بولەك رەسەيلىك ساربازدار دا جەر سىلكىنىسىنەن زارداپ شەككەن سيريانىڭ بىرنەشە اۋماعىنا گۋمانيتارلىق كومەك كورسەتكەن. ولار سيريالىقتارعا ازىق-تۇلىك تاراتىپ، جىلۋمەن قامتاماسىز ەتۋدە.