تۇركيانىڭ گازيانتەپ قالاسىنداعى وبەكتىلەردىڭ بىرىندە قازاقستاننان بارعان قۇتقارۋشىلار ۇيىندىلەردىڭ استىنان 3 ادامدى تىرىدەي شىعارىپ الدى. بۇل تۋرالى توتەنشە جاعدايلار مينيسترلىگىنىڭ باسپا ءسوز قىزمەتى حابارلادى.
قۇتقارۋشىلار قيراعان كونسترۋكسيالاردىڭ استىنا ءتۇسىپ، ادامداردى جوعارىداعى تۇرىك ارىپتەستەرىنە جەتكىزىپ بەرگەن.
"قۇلاعان توعىز قاباتتى ءۇيدىڭ قيراندىلارىنىڭ استىنان ءبىر قارت ادام مەن ەكى جاس جىگىت شىعارىپ الىندى. قازاقستاندىق قۇتقارۋشىلار ولارعا ءبىرىنشى بولىپ بارىپ، ادامداردى تۇركيالىق ارىپتەستەرىنە جانە مەديسينالىق قىزمەتتەرگە تاپسىردى. جۇمىستار ءۇزىلىسسىز ەكى تاۋلىك بويى كونسترۋكسيالاردىڭ قۇلاۋ ءقاۋپى ءتونىپ تۇرعانىمەن اسا كۇردەلى جاعدايلاردا جۇرگىزىلدى. ادامداردى انىقتاۋ ءۇشىن كينولوگيالىق ەسەپتوپتار جانە ارنايى ىزدەۋ قۇرالدارى بەلسەندى تۇردە تارتىلدى" دەلىنگەن مينيسترلىك حابارلاماسىندا.
تۇركيا مەن سيريا شەكاراسى ماڭىندا بولعان جويقىن جەر سىلكىنىسى سالدارىن جويۋ جۇمىستارى جالعاسىپ جاتىر. سوڭعى مالىمەتتەرگە ساي، تۇركيادا ءزىلزالادان قازا بولعاندار سانى 12 مىڭنان اسقان. ۇيىندىلەردى ارشۋ، ءتىرى قالعان ادامداردى قۇتقارۋ جۇمىستارى تاۋلىك بويى ءجۇرىپ جاتىر.
جەر سىلكىنىسىنەن كەيىن تۇركيادا 4 قازاقستاندىقتىڭ جوعالىپ، ونىڭ بىرەۋى امان-ەسەن تابىلعان. ءۇيىندى استىندا قالعان سابيرا مامادياروۆا ازداعان جاراقاتتار العان.
پىكىر قالدىرۋ