جۋىردا ۇكىمەت وتىرىسىندا توتەنشە جاعدايلار ءمينيسترى ءبىرقاتار وبلىستاردا كۇننىڭ جىلىنۋىمەن سەل ءجۇرىپ، سۋ تاسقىنى بولۋى مۇمكىن ەكەنىن ءمالىم ەتتى. وقىس وقيعالار كوكتەم ەرتە كەلەتىن تۇركىستان وبلىسىندا باستالىپ تا كەتتى. وسى ورايدا قامشى پورتالى ءقاۋىپ ايماعىندا تۇرعان وبلىس اكىمدەرىنە سۇراۋ سالىپ، كوكتەمگى سۋ باسۋعا دايىندىعى، بۇعان دەيىنگى وقيعالاردان قانشالىقتى ساباق العانى جونىندە سۇرادى. تومەندە باتىس قازاقستان وبلىسىنداعى احۋال تۋرالى وبلىس اكىمى اپپاراتى باسشىسىنىڭ ورىنباسارى ارسەن عۇباشيەۆتىڭ جاۋابى ۇسىنىلعان.

1) وڭىردە قانداي پروبلەمالىق ۋچاسكەلەر بار؟ قانشا ەلدىمەكەنگە سۋ باسۋ ءقاۋپى ءتونىپ تۇر؟

كوپ جىلدىق مونيتورينگكە سايكەس وبلىستا سۋ تاسقىنى تاۋەكەلى ايماعىندا 138 ەلدىمەكەن ورنالاسقان، ولاردىڭ 105-ىندە ءقاۋىپ ازايتىلدى، 1-ەۋىندە ءقاۋىپ جويىلدى، ال قالعان 32-سىندە ءقاۋىپ ساقتالۋدا، ولاردا قاۋىپ-قاتەردى ازايتۋ بويىنشا جۇمىستار «2021-2023 جىلدارعا ارنالعان سۋ تاسقىنىنا قارسى شارالار جول كارتاسى» مەن ينجەنەرلىك جۇمىستار جوسپارى شەڭبەرىندە جۇرگىزىلەتىن بولادى.

سۋ تاسقىنى ءقاۋپى بار بارلىق اۋىلدار ەرەكشە باقىلاۋعا الىندى، جاۋاپتى لاۋازىمدى تۇلعالار، ينجەنەرلىك تەحنيكا جانە ماتەريالدىق رەسۋرستار بەكىتىلدى.

2) ەلدىمەكەندەردى سۋ تاسقىنىنان ساقتاۋ ءۇشىن، سۋ باسۋ زاردابىن تومەندەتۋ، وقىس وقيعالار مەن قايعىلى جاعدايلاردىڭ الدىن الۋ ءۇشىن نە ىستەلىنىپ جاتىر؟

قازىرگى تاڭدا 2023 جىلعى سۋ تاسقىنى كەزەڭىندەگى توتەنشە جاعدايلاردىڭ الدىن الۋ جوسپارىنا سايكەس جۇمىستار اتقارىلۋدا. جانار-جاعارماي ماتەريالدارىنىڭ، قاپتاردىڭ، ينەرتتى ماتەريالداردىڭ (18 مىڭ توننا ينەرتتى ماتەريالدار، 56 مىڭ قاپ، 78 توننا ججم) قورلارى دايىندالدى.

205 ملن. تەڭگەگە مۇز جارۋ جۇمىستارىنا، تىكۇشاقتى تارتۋعا («كازاۆياقۇتقارۋ» اق) جانە عارىشتىق مونيتورينگتى («قازاقستان عارىش ساپارى» ۇك) جۇزەگە اسىرۋعا شارتتار جاسالدى.

وبلىس بويىنشا توتەنشە جانە شۇعىل شىعىندارعا ارنالعان رەزەرۆتەردە 2،7 ملرد. تەڭگە كوزدەلگەن، بۇل وتكەن جىلمەن  سالىستىرعاندا 30%-عا كوپ (2022 ج. - 1،9 ملرد.تەڭگە).

2 مىڭنان استام ادامدى، 700-گە جۋىق تەحنيكانى، 85 ءجۇزۋ قۇرالدارىن جانە 276 موتوپومپانى قۇرايتىن كۇشتەر مەن قۇرالدار توپتاماسى دايىن.

3) توتەنشە جاعدايلار ءمينيسترى يۋريي يلين سۋ باسۋدىڭ ءداستۇرلى سەبەپتەرى رەتىندە وزەن ارنالارىنىڭ تولىپ قالۋى مەن بالدىرلانۋىن، درەناجدىق-ارىق جۇيەلەرىنىڭ بولماۋىن اتاعان. مۇنداي پروبلەمالار ءسىزدىڭ وبلىستا قالاي شەشىلىپ جاتىر؟

وتكەن جىلى 193 ملن. تەڭگەدەن استام قارجىعا 4 كانال تازارتىلدى (جانىبەك، سانكىباي، پەرۆوماي، تايپاق، 35،8 كم)، سونىمەن قاتار 13 گيدروتەحنيكالىق قۇرىلىستى جوندەۋ جۇرگىزىلدى (سانكىباي (4)، پەرۆوماي، جانىبەك (2)، باعىرلاي كانالدارى، ۆارفولومەيەۆ گيدروتورابى، 1-كازتالوۆ سۋ قويماسى، 2-كازتالوۆ سۋ قويماسى، مامايەۆ گيدروتورابى، سارىشىعاناك سۋ قويماسى).

شيەلى، دەركول وزەندەرىندە قامىس شابۋ جۇمىستارىن جۇرگىزىلىپ، بيىل ارنانى تازارتۋ جوسپارلاندى.

سونىمەن قاتار 2،6 ملرد تەڭگەنى قۇرايتىن كيروۆ-شەجىن ماگيسترالدىق كانالىن رەكونسترۋكسيالاۋ جۇرگىزىلۋدە.

جالپى وبلىستا 74 گيدروتەحنيكالىق قۇرىلىم بار، ونىڭ ىشىندە 7 سۋ قويماسى جوندەۋدى قاجەت ەتەدى. سۋ قويمالارىن كەزەڭ-كەزەڭمەن جوندەۋ جوسپارى جاساقتالدى.

4) ۇكىمەت باسشىسى پروبلەمالىق وڭىرلەردىڭ اكىمدەرى قاردى ۋاقىتىلى شىعارۋدا سىلبىرت قيمىلداپ وتىرعانىن ءمالىم ەتىپ، شارۋانى شيراتۋدى تاپسىردى. وسى ۋاقىتقا دەيىن اتقارىلعان جۇمىس كولەمى قانداي؟

بۇگىنگى تاڭدا قاردىڭ بيىكتىگى 12 سم قۇرايدى، بۇل وتكەن جىلدىڭ كورسەتكىشىنەن 20 سم-گە تومەن (2022 ج. - 32 سم). قاردى ۋاقىتىلى شىعارۋ جۇمىستارى تۋالىك بويى جۇرگىزىلەدى.

5) ءاليحان سمايلوۆ سونداي-اق وبلىس باسشىلارىنا بۇرىنعى قاتەلىكتەردى قايتالاماۋدى قاتاڭ تاپسىرعان. الدىڭعى جىلدارداعى جاعدايدان ناتيجە شىعارىپ، «بيىل وبلىسىمىز كوكتەمگى سۋ تاسقىنىنا ءتاس-تۇيىن دايىن» دەپ ايتا الاسىز با؟

قازىرگى تاڭدا 2023 جىلعى سۋ تاسقىنى كەزەڭىندەگى توتەنشە جاعدايلاردىڭ الدىن الۋ جوسپارىنا سايكەس جۇمىستار اتقارىلۋدا. سۋ تاسقىنى ءقاۋپى بار بارلىق اۋىلدار ەرەكشە باقىلاۋعا الىندى، جاۋاپتى لاۋازىمدى تۇلعالار، ينجەنەرلىك تەحنيكا جانە ماتەريالدىق رەسۋرستار بەكىتىلدى.

6) كوكتەمدەگى وقىس وقيعالار كەزىندە جەرگىلىكتى اكىمدىكتەردىڭ شاماسى جەتپەي جاتقان جۇمىستى حالىق الەۋمەتتىك جەلى ارقىلى جىلۋ جيناپ شەشكەن جاعدايلارعا كوپشىلىك كۋا. سىزدەردىڭ وبلىس سۋ باسۋدىڭ زارداپتارىن جويۋ، سۋ باسقان ەلدىمەكەندەردىڭ حالقىن ەۆوكۋاسيالاۋ سىندى شارۋالارعا قانشالىقتى ءازىر؟

قازىرگى تاڭدا 2023 جىلعى سۋ تاسقىنى كەزەڭىندەگى توتەنشە جاعدايلاردىڭ الدىن الۋ جوسپارىنا سايكەس جۇمىستار اتقارىلۋدا. جانار-جاعارماي ماتەريالدارىنىڭ، قاپتاردىڭ، ينەرتتى ماتەريالداردىڭ قورلارى ازىرلەندى، سونىمەن قاتار وبلىس بويىنشا بارلىق ەۆاكۋاسيالىق پۋنكتتەر دايىندالدى.