قانداس مارتەبەسىن الۋ ءۇشىن وتىنىمدەر قازاقستان ەلشىلىكتەرى ارقىلى "ءبىر تەرەزە" قاعيداتى بويىنشا قابىلدانادى. جاڭا تەتىك ءبىرقاتار مەملەكەتتە پيلوتتىق رەجيمدە ىسكە اسىرىلىپ جاتىر، دەپ حابارلايدى ەڭبەك جانە حالىقتى الەۋمەتتىك قورعاۋ مينيسترلىگى.

"بۇل ەلگە كەلۋ، جۇمىس ورنى مەن تۇرعىن ءۇي بەرۋ مۇمكىندىكتەرى تۋرالى ماسەلەلەردى شەشۋگە جانە رەسپۋبليكا اۋماعىنا كىرمەي–اق قانداس مارتەبەسىن الۋعا مۇمكىندىك بەرەدى"، – دەلىنگەن حابارلامادا.

مينيسترلىكتىڭ اقپاراتىنشا، ءقازىر ەتنيكالىق قازاقتاردان ءوتىنىش قابىلداۋ قازاقستان سىرتقى ىستەر مينيسترلىگىنىڭ ۆيزالىق رەجيم ەلدەرىندەگى (تۇرىكمەنستان، موڭعوليا، جۇڭگو، يران، اۋعانستان) مەكەمەلەرىندە پيلوتتىق رەجيمدە جۇرگىزىلىپ جاتىر. كەيىنىرەك ەلشىلىكتەر ارقىلى ءوتىنىم قابىلداۋ ۆيزاسىز رەجيمى بار ەلدەردە دە جۇرگىزىلەدى.

بۇگىنگى تاڭدا قازاقستاننىڭ شەت ەلدەردەگى مەكەمەلەرى ارقىلى شەتەلدە تۇراتىن ەتنيكالىق قازاقتاردان 771  ءوتىنىش قابىلداندى. سونداي–اق، ماڭعىستاۋدا وبلىس اكىمى ورىنباسارىنىڭ باسشىلىعىمەن قانداستاردى جايعاستىرۋ جانە قابىلداۋ جونىندەگى ارنايى كوميسسيا قۇرىلدى، ول ەتنيكالىق قازاقتاردىڭ وڭىردە تۇرۋعا وتىنىشتەرىن دەربەس قارايدى.

"تۇراقتى نەگىزدە جۇمىس ىستەيتىن وسىنداي كوميسسيالار الداعى ۋاقىتتا ەلىمىزدىڭ بارلىق وڭىرىندە قۇرىلادى"، – دەپ مالىمدەدى ەڭبەك مينيسترلىگى.