الماتى وبلىسى جاڭالىق اۋىلىندا قازبا جۇمىستارىنىڭ ناتيجەسىندە ساياسي قۋعىن–سۇرگىنگە ۇشىراپ، اتۋ جازاسىنا كەسىلگەن ازاماتتاردىڭ سۇيەگى ءالى دە تابىلىپ جاتىر. 

2018 جىلى جاڭالىق اۋىلىنان 56 ادامنىڭ قاڭقاسى تابىلعان بولاتىن. ولار 1 مەتردەن ءسال عانا اساتىن تەرەڭدىكتە كومىلگەن. قازبا جۇمىستارى كەزىندە ماماندار تەرەڭ كومىلمەگەن جەردە ادامعا تيەسىلى تىزە، جاۋىرىن مەن قابىرعا سۇيەگىن تاپقان. سونىمەن قاتار، بۇل اۋماقتا وسىعان دەيىن ادامداردىڭ باس سۇيەگى، ءتىرى كەزىندە قولدانعان زاتتارى جانە دەنە قاڭقالارى قازىپ الىنعان.

"ءۇش–ءتورت دومالاق كوزىلدىرىك تابىلدى. مۇشتىك، تەرىدەن تىگىلگەن ءماسى بار. جاي ادامداردىڭ زاتتارى ەمەس. بىر-بىرىنە قاتىپ قالعان، سالماعى 1-2 كگ گيلزا بار. ءبارىنىڭ جەلكەسى تەسىك"، – دەدى جاڭالىق اۋىلىنىڭ تۇرعىنى مۇرات قىرعىزباي ۇلى.

بۇگىندە 50 دەن اسا ادامنىڭ دەنەسى تابىلعان جەردە رەسمي زەرتتەۋ باستالدى. ارحەولوگتاردىڭ پايىمداۋىنشا، اتىلعان ادامدار توپ–توبىمەن وسى اۋماققا كومىلگەن.

"پوستكەڭەستىك مەملەكەتتەر مەن رەسەيدە ىزدەۋ–بارلاۋ جۇمىستارى جۇرگىزىلەدى. ال قازاقستاندا قۋعىن–سۇرگىن قۇرباندارىن العاش زەرتتەپ وتىر"، – دەدى زەرتتەۋ توبىنىڭ اعا عىلىمي قىزمەتكەرى، ارحەولوگ باۋىرجان بەيسەتايەۆ. 

ءار جىلدارى تابىلعان سۇيەكتەردىڭ ساقتالۋ دەڭگەيى دە ءار ءتۇرلى. قىرعا كومىلگەن دەنەلەر سايدا كومىلگەن دەنەلەردەن قاراعاندا الدەقايدا جاقسى ساقتالعان. ماماندار بۇعان اۋا تەمپەراتۋراسى مەن جەردىڭ ىلعالدىلىعى اسەر ەتكەن، دەپ ءتۇسىندىردى.

"ءۇش–ءتورت كۇن بۇرىن وسى جەردە بارلاۋ جاسادىق. الماتى وزەنىنىڭ سول جاعىنان دا، وڭ جاعىنان دا قازىلعان ور بار. نەگىزىنەن، سول شۇڭقىردى پايدالانىپ ساربازدار وقۋ–جاتتىعۋ وتكىزدى مە ەكەن دەپ ويلايمىز. قارايمىز دەپ بەلگىلەپ قويعان 20 نۇكتە بار"، – دەدى زەرتتەۋ توبىنىڭ عىلىمي قىزمەتكەرى رۋسلان شەربايەۆ.

جاڭالىق اۋىلىندا تابىلعان ادام قاڭقاسىنىڭ جاسى شامامەن 168 جىل. بيىلعى زەرتتەۋدە بۇل قاتارعا تاعى ءبىرشاما ماتەريال قوسىلادى. ارحەولوگتاردىڭ بولجامىنشا، اۋىل ماڭىندا 2 مىڭعا جۋىق رەپرەسسيا قۇربانى جەرلەنگەن بولۋى مۇمكىن. 

دەرەككوز: اlmaty.tv