FlyArystan اۋە كومپانياسى اۋەجايدا حالىقارالىق رەيستەرگە اقىلى تىركەۋ قىزمەتىن ءبىر كۇنگە جەتپەي توقتاتتى.
لوۋكوستەر 3 تامىزدان باستاپ اۋەجايدا تىركەلۋ قىزمەتىن اقىلى ەتكەن. وسىدان كەيىن الەۋمەتتىك جەلىدە اۋە كومپانياسىن سىنعا العان ادامدار كوبەيدى. بۇگىن كومپانيا اقىلى قىزمەتتى توقتاتاتىنىن مالىمدەدى.
"وكىنىشكە قاراي، حالىقارالىق رەيستەرگە ارنالعان قىزمەتتى ىسكە قوسۋ كەزىندە لوۋكوستەر كۇتپەگەن قيىندىقتارعا تاپ بولدى. وسىعان بايلانىستى بارلىق ماسەلە شەشىلگەنشە وسى قىزمەتتى ەنگىزۋ جۇمىسى ۋاقىتشا توقتاتىلدى. اۋە كومپانياسى اۋەجايدا اقىلى تىركەۋ قىزمەتىن ساتىپ العان جولاۋشىلاردىڭ اقشاسىن قايتارىپ بەرەدى"، - دەلىنگەن رەسمي حابارلامادا.
ايتا كەتەرى، ونلاين تىركەلۋ قىزمەتىنە قاتىستى وزگەرىس بولماعان. ول تەگىن بولىپ قالا بەرەدى.
"بۇل حالىقارالىق ساياحاتتار ءۇشىن وتە ءتيىمدى ءتاسىل. جازعى ۋاقىتتا اۋەجايدا ادام كوپ. ال ونلاين تىركەلۋدىڭ ارقاسىندا ۇزىن-سونار كەزەكتەر پەن كەپتەلىستەن قۇتىلۋعا بولادى"، - دەيدى كومپانيا ماماندارى.
پىكىر قالدىرۋ